«ԵԱՀԿ խորհրդարանական վեհաժողովի շրջանակում եւ առանձին հանդիպումների ժամանակ ղարաբաղյան հիմնադրի առնչությամբ առաջնահերթ ուշադրություն ենք հրավիրում, որ հարցի էությունը արցախցիների ինքնորոշման իրավունքների շրջանակում է եղել։ Փաստերի լեզվով փորձում ենք հնարավորինս ապացուցողական տվյալներ ներկայացնել, թե ինչու է կարեւոր արցախցիների գոյութենական խնդրի վերհանումը։ Սա անկյունաքարային թեման է, որի առնչությամբ բոլոր պատվիրակություններով քննարկում ենք արտերկրի գործընկերների հետ»,-լրագրողների հետ ճեպազրույցում այսօր ասաց ԱԺ արտաքին հարաբերությունների հանձնաժողովի նախագահ, ՔՊ խմբակցության պատգամավոր Էդուարդ Աղաջանյանը՝ անդրադառնալով հարցադրմանը, թե ԵԱՀԿ ԽՎ աշնանային նստաշրջանում Արցախի հարցով ի՞նչ ուղերձներ են փոխանցել միջազգային գործընկերներին։
Հարցին՝ ԵԱՀԿ-ն այս պահին որքանո՞վ է դիտարկվում որպես ԼՂ հակամարտությունը լուծելու միջնորդ, Էդուարդ Աղաջանյանը պատասխանեց․ «ՄԽ ձևաչափն, այդ թվում՝ օբյեկտիվ պատճառներով, սկսած Ուկրաինայում պատերազմից, կանգնել է խնդիրների առաջ։ Համանախագահ երեք պետությունները խնդիր ունեն մի սեղանի շուրջ նստելու։ Բնականաբար, այդ առումով ՄԽ գործունեությունը, կարելի է ասել, ճգնաժամային է՝ հաշվի առնելով այն իրավիճակը, որում հայտնվել են այդ երեք երկրները»։
Լուիզա ՍՈՒՔԻԱՍՅԱՆ
