Քաղաքական գործիչ Էդգար Ղազարյանը «Հայելի» ակումբում խոսեց երկու օր առաջ դեպի Արցախ տանող միակ ցամաքային ճանապարհը Ադրբեջանի կողմից անհեթեթ պատճառաբանությունով փակելու մասին:
«Ես ի՞նչ էի բղավում՝ այս տարվա մարտ ամսից սկսած: Ասում էի, որ Բերձորը չի կարելի հանձնել, որ դա միայն ճանապարհ չէ, այլ միջանցք է, որ միջանցքի վրա Ադրբեջանը անվտանգությունը հսկելու պարտականություն ունի: Այդ ամենը դրեցին մի կողմ, Մեհրիբան Ալիեւայի ծննդյան օրը Նիկոլ Փաշինյանը Բերձորը հանձնեց Ադրբեջանին: Ասում էի, որ փակելու են այդ ճանապարհը, որովհետեւ, եթե միջանցքը իրավունք չունեն փակելու, ապա այդ ճանապարհը իրենց կառուցած ճանապարհն է, եւ երբ ուզեն` փակելու են:
Ցանկացած գործ կազմակերպելու համար մի ուսումնական վարժանք են անցկացնում: Ու մեկ էլ պարզվում է, որ ադրբեջանցի բնապահպանները փակել են ճանապարհը: Նախ, Ադրբեջանում քաղաքացիական հասարակություն գոյություն չունի: Այն կայացած բռնապետություն է: Երկրորդ, զավթված տարածքներում Ադրբեջանը բնակեցման ոչ մի ծրագիր դեռ չի իրականացրել: Այսինքն, այնտեղ քաղաքացիական բնակչություն գոյություն չունի, կան միայն զինվորականներ կամ պետական այլ ծառայությունների աշխատակիցներ, գուցե նաեւ` նրանց ընտանիքի անդամներ: Այնտեղ սովորական քաղաքացիական բնակիչ գոյություն չունի: Եվ երրորդ. այն հատվածից, որտեղից ճանապարհը փակել էին, իսկ դա Շուշիի հատվածից է, Շուշիի այդ հատվածում Ադրբեջանի սահմանապահ զորքերի ուղեկալ կա: Հետեւաբար, մինչեւ սահմանապահը թույլ չտա, Ադրբեջանի կողմից մարդ չի կարող հայտնվել խաղաղապահ զորքերի վերահսկողության տակ գտնվող գոտում: Իրենք ուղղակի թույլ չէին տա:
Այս ամենը վկայում է, որ ճանապարհը փակելը Ադրբեջանը կազմակերպել է պետական մակարդակով: Եվ այդ մարդիկ ակնհայտորեն քաղաքացիական հագուստով Ադրբեջանի զինվորներ են կամ հատուկ ծառայությունների աշխատակիցներ:
Կարդացեք նաև
Եվ ո՞վ է գնում այդ ճանապարհը բացելու: Կարմիր բերետավորնե՞րը, Արցախի ոստիկանությո՞ւնը, թե՞ Արցախի պաշտպանության բանակը: Իհարկե՝ ոչ մեկը: Սպասում են, մինչեւ ռուսական խաղաղապահ զորքերի հրամանատարը գա բանակցելու: Եվ ավետիս՝ երեք ժամ տեւած բանակցությունների արդյունքում բացվել է ճանապարհը:
Իսկ ինչքա՞ն է տեւում Երեւանում, Հայաստանի ներսում ճանապարհ բացելը կարմիր բերետավորների կողմից: Մի քանի րոպե: Տարբերությունը սա է. Հայաստանում, երբ ճանապարհը փակում են հայերը, նրանք անմիջապես բերման են ենթարկվում, իսկ երբ Հայաստանում ճանապարհ են փակում թուրքերը, դրանք մնում են փակ, քանի դեռ ռուսները չեն միջամտել: Այսինքն, եզրահանգումը հետեւյալն է՝ 2018-ի ադրբեջանա-թուրքական հեղափոխությունից սկսած՝ Հայաստանում ճանապարհ փակելու իրավունք ունեն միայն թուրքերը…»-ասաց Էդգար Ղազարյանը:
Աշոտ ՀԱԿՈԲՅԱՆ
