Ընդդիմության պատգամավորները սկսել են մանդատները վայր դնել: Այսօր ԱԺ-ում լրագրողները «Հայաստան» խմբակցության պատգամավոր Իշխան Սաղաթելյանին հարցրեցին՝ ինքը պատրաստվո՞ւմ է մանդատը վայր դնել, որովհետեւ մամուլում այդ մասին հրապարակումներ կան՝ նա պատասխանեց. «Այո, չեմ թաքցնի, այդ մասին քննարկումներ եղել են: Բայց ՀՅԴ ԳՄ-ն կայացրել է որոշում, որ «Հայաստան» խմբակցության բոլոր դաշնակցական պատգամավորները պետք է մասնակցեն խորհրդարանի աշխատանքներին: ՀՅԴ-ի մեջ անհատական, անձնական որոշումները չկան այլեւս, երբ որ կա Գերագույն մարմնի որոշում: Հետեւաբար, ես իմ մանդատը վայր չեմ դնելու: Եթե դնեինք, դնելու էինք բոլորս, եթե մասնակցում ենք, մասնակցում ենք բոլորս»:
Հարցին՝ ի՞նչ լուրջ տարաձայնություններ կան, որ խմբակցության մյուս պատգամավորները մանդատները դնում են եւ ըստ ցուցակի ովքեր պետք է գան, իրենք եւս հրաժարվում են իրենց մանդատներից՝ նա պատասխանեց. «Վերածնվող Հայաստան» կուսակցությունը հայտարարություն արել է, «Հայաստան» խմբակցությունը դրան պատասխանել է, ես որեւէ մեկնաբանություն դրան չունեմ, ամեն ինչ եղել է հրապարակային»:
Հարցին՝ հնարավո՞ր է իշխանությունների գործոնը կա, մամուլում Վահե Հակոբյանին հնարավոր ձերբակալելու տարբերակներ կան, կարո՞ղ է ճնշումերի միջոցով փորձում են կազմաքանդել ընդդիմադիր խմբակցությունը՝ Իշխան Սաղաթելյանը պատասխանեց՝ այն, որ իշխանությունը ամեն կերպ, բոլոր հնարավոր օրինական ու ապօրինի մեթոդներով փորձում է ճնշումներ գործադրել ընդդիմադիրների նկատմամբ՝ ակնհայտ է, կան բազմաթիվ փաստեր. «Ես ՀՅԴ-ի անունից ասում եմ, որ որեւէ ճնշում, որեւէ փորձ, ինչ ուզում է անեն, մենք մինչեւ վերջին շունչ բոլոր հնարավոր մեթոդներով մեր պայքարը շարունակելու ենք»:
Սաղաթելյանը նշեց, որ խորհրդարանը պայքարի գործիքներից մեկն է, փողոցային պայքարի հետ համադրելու են ու հայտարարեց. «Այս իշխանությանը, որի գործունեության արդյունքում մեր հայրենիքի մի մասը մնացել է թշնամուն եւ շարունակում են քաղաքականությունը, այդ իշխանությանը հեռացնելու ցանկացած միջոց արդարացված է, այդ թվում՝ ժողովրդական ապստամբությունը»:
Կարդացեք նաև
Իշխան Սաղաթելյանը հիշեց, որ վերջին 3 տարիներին, հատկապես՝ վերջին 6 ամսվա ընթացքում իր ընտանիքը ենթարկվում է հետապնդումների. «Ապօրինի խուզարկություններ, հարցաքննություններ, ինչ կարող են ՝անում են: Հայրս էլ է հարցաքննվել, հարազատներիս ընկերություններ են մտել, ապօրինի քայլեր արել, խուզարկել են, հորս փորձում են մեղադրանք առաջադրել, մի ուրիշ գործով կանչել են հարցաքննության: Ձեզ ընդամենը մի բան ասեմ՝ իմ հերն ինձ ասել է՝ տղա ջան, էս պայքարից հետ կանգնել չկա, մեր տան հարսներն էլ են պատրաստ նստելու, ինչ կարան, թող անեն: Իսկ ինչ վերաբերում է մանդատից զրկելուն, սրանք մեր հայրենիքից են զրկել, 5000 հայորդու կյանքից են զրկել, մանդատը ի՞նչ է, որ չփորձեն զրկել: Վստահ եմ, որ փորձելու են զրկել, թող փորձեն»:
Նա վստահեցրեց, որ իրենց օրակարգն է կանխել կապիտուլյացիան, հեռացնել այս իշխանությանը. «Հայաստանում կան ուժեր, որոնք կանխում են Նիկոլ Փաշինյանին ստորագրել այսպես կոչված խաղաղության պայմանագիրը: Պայքարը պետք է շարունակվի»:
Հռիփսիմե ՋԵԲԵՋՅԱՆ
