Դեկտեմբերի 1-ին ՀՀ կառավարությունն ընդունեց նախագիծ, որով մոտ 10 մլրդ դրամի չափով աջակցություն կցուցաբերվի տեղեկատվական տեխնոլոգիաների (ՏՏ) ոլորտի ընկերություններին։
Բարձր տեխնոլոգիական արդյունաբերության նախարար Ռոբերտ Խաչատրյանը հայտնեց, որ առաջարկվում է պետական աջակցություն տրամադրել ՏՏ ոլորտի այն կազմակերպություններին ու անհատ ձեռնարկատերերին, որոնք 2022-ի հունիսից հոկտեմբերին իրենց աշխատակիցներին տրվող աշխատավարձային ֆոնդը չեն կրճատել 20 տոկոսից ավելի։ Ինչպես նաև՝ նրանց կողմից արտերկիր արտահանվող ծառայությունների ծավալն աջակցության տրամադրման ժամանակահատվածում կազմել է իրացման շրջանառության առնվազն 70 տոկոսը։
Կառավարության նիստում նշվեց, որ որոշումը պայմանավորված է Հայաստանում ՏՏ ոլորտի վրա համաշխարհային շուկայում տեղի ունեցող փոփոխությունների շղթայական ազդեցությամբ, ինչպես նաև դրամի արժևորման հետևանքով ՏՏ ոլորտում գործող ընկերությունների արտահանման արդյունքում ստացված եկամուտների նվազմամբ։
«Կարծում ենք՝ ստացված արդյունքը խոսում է տեխնոլոգիական համայնքի միասնական ձայնի նշանակալիության մասին։ Համայնքը հանդես եկավ ընդհանուր ճակատով և այս հարցի շուրջ հասավ հաղթական արդյունքի։ ԱՏՁՄ-ն իր շնորհակալությունն է հայտնում համայնքին համագործակցության և կոնսոլիդացիայի համար», – նշում է ԱՏՁՄ գործադիր տնօրեն Հայկ Չոբանյանը։
Կարդացեք նաև
Հիշեցնենք, որ սույն թվականի սեպտեմբերի 12-ից Էկոնոմիկայի նախարարության կողմից պատրաստվել և շրջանառության է դրվել «Տեղեկատվական տեխնոլոգիաների ոլորտում գործունեություն իրականացնող առևտրային կազմակերպություններին և անհատ ձեռնարկատերերին պետական աջակցության տրամադրման կարգը հաստատելու մասին» ՀՀ կառավարության որոշման նախագիծը։
Հոկտեմբերի 14-ին ԱՏՁՄ-ն հայտարարություն տարածեց` ՏՏ ոլորտի ընկերություններին հրատապ աջակցության անհրաժեշտության մասին։ Համաշխարհային հայկական գագաթնաժողովի շրջանակներում ԱՏՁՄ գործադիր տնօրեն Հայկ Չոբանյանը ևս բարձրաձայնեց խնդիրը, նշելով որ Հայաստանի առաջընթացի երաշխիքը գիտական և տեխնոլոգիական ոլորտի բուռն զարգացումն է:
Նոյեմբերի 2-ին ԱՏՁՄ գրասենյակում տեղի ունեցավ համատեղ ասուլիս Միության վարչության անդամների և ՏՏ խոշոր ընկերությունների ղեկավարների կողմից, որի թեման արտարժույթի արժեզրկման ազդեցությունն էր ՏՏ ոլորտի ընկերությունների գործունեության վրա և արձագանքը պետության կողմից ձեռնարկված քայլերին։ ՏՏ ոլորտի ներկայացուցիչները հրատապ պահանջով դիմեցին Կառավարությանը և պաշտոնական նամակ հղեցին ՀՀ վարչապետ Նիկոլ Փաշինյանին։
ԱՏՁՄ հանրային կապերի պատասխանատու
Աննա Դանիելյան
