Մարդիկ են կերտում ու ապրեցնում համայնքը, երկիրը և հայրենիքը:
«Ջերմուկն ապրեցնող մարդիկ» շարքն իրականացվում է «Դեպի Ջերմուկ» քաղաքացիական նախաձեռնության կողմից, որի նպատակն է հանրայնացնելու Ջերմուկի ողջ հմայքն ու գրավչությունը՝ մարդկանց, հայտնի ու անհայտ վայրերի միջոցով:
Սամվել Ենոքյանը Ջերմուկին գույն ու շունչ հաղորդող մարդկանցից է:
Շատերը Սամվելին գիտեն որպես գեղանկարիչ, որն ամեն օր իր կտավներով էլ ավելի է գեղեցկացնում Ըմպելասրահի առանց այն էլ բացառիկ տեսարանը։
Կարդացեք նաև
Բայց քչերը գիտեն, որ նա նաև նկարիչ-վերականգնող է (արվեստի ստեղծագործությունների վերականգնում, կոնսերվացում և պահպանում):
Սամվելն ամբողջ տարի իր նկարներով բացօդյա ցուցահանդես-վաճառք է կազմակերպում Ջերմուկի հանքային ջրերի Ըմպելասրահում՝ մեզ հաղորդակից դարձնելով արվեստի աշխարհին:
-Ուստա՛ Սամվել, կգա՞ք ինձ հյուրանոցից ջրվեժ իջեցնեք։
-Ո՞նց չեմ գա։ Արդեն էդտեղ եմ,- ասում է տաքսիստ Սամվելը, որն ամենուր է՝ միաժամանակ Ջերմուկի և՛ Աջ ափին, և՛ Ձախ։
Նա այնքան պարտաճանաչ է ու այնքան արագ է հասնում Ձեզ, որ վստահ կարող եք ասել` Ջերմուկում անձնական վարորդ ունեք։
Սամվելը ոչ միայն հմուտ վարորդ է, այլև հրաշալի զրուցընկեր։ Գիտի` որտեղ ինչ կա, որտեղ ինչն է համեղ, որ հյուրանոցում ազատ տեղեր կան: Ջերմուկում լինեք, ծանոթացեք Սամվելի հետ. նա Ձեզ այնքան պատմելու բան ունի։
Նորաձեւություն թելադրողը Ջերմուկում դերձակ Վասակն է։ Հենց նրա ձեռքի տակով են անցնում բոլոր կարևոր առիթների` ծնունդների, կնունքների, հարսանիքների համար նախատեսված հագուստները։
Վասակն արդեն 40 տարի է՝ դերձակությամբ է զբաղվում։ Այս տարիների ընթացքում հասցրել է հազարավոր հաճախորդներից պատվերներ ընդունել:
Դերձակ Վասակին ճանաչում են ոչ միայն կարուձևի վարպետությամբ. նա նաև բացառիկ հումորի տեր է։ Երբ լինեք Ջերմուկում ու դերձակի կարիք ունենաք, արդեն գիտեք ում դիմել:
Շահբազյան Հայկը (գլխավոր լուսանկարում) յուրահատուկ, կոլորիտային մարդ է՝ Ջերմուկն ապրեցնող մարդկանցից մեկը: Հայկն առանձնանում է նկարչության ընդգծված ոճով և ներկերի յուրահատկությամբ: Ներկերի մեծ մասն ինքն է պատրաստում՝ քարերից: Ճիշտ կարդացիք՝ քարերից:
Հայկն իր նկարները վաճառում է Ըմպելասրահի ներսում: Այցելեք, Ջերմուկ, ընկերացեք Հայկի հետ և ծանոթացեք նրա ստեղծագործություններին:
Ավետյան Վարդանը բացառիկ տաղանդավոր նկարիչներից է՝ բնության ու Ջերմուկի իսկական սիրահար: Ջերմուկ այցելելիս անպայման գնացեք Ազգային պատկերասրահի Ջերմուկի մասնաճյուղ, որտեղ նա անցկացնում է իր օրվա հիմնական մասը:
Վարդանի հետ շփվելով Դուք կբացահայտեք ջերմուկյան մեկ այլ տիեզերք, որտեղ նա կառուցել է իր աշխարհն ու իր կերպարներին:
«Դեպի Ջերմուկ» քաղաքացիական նախաձեռնություն
