ԱԺ նախագահ Ալեն Սիմոնյանն օրերս չէր բացառել, որ օրենքի հետ խնդիր ունեցող և պատգամավորական մանդատով պաշտպանվող պատգամավորների նկատմամբ համապատասխան միջոցներ ձեռք կառնվեն։ ԱԺ «Հայաստան» խմբակցության պատգամավոր Արծվիկ Մինասյանի կարծիքով՝ իշխանությունը փորձելու է տպավորություն ստեղծել, թե «Հայաստան» դաշինքը հանցագործների բանդա է։ «Կփորձեն նաեւ քայլ կատարել մանդատներից զրկելու գործընթացում։ Դա իշխանության էությունն է ու կերպարը»,-խորհրդարանում լրագրողների հետ ճեպազրույցում այսօր ասաց Արծվիկ Մինասյանը։
Հիշեցնենք, որ «Հայաստան» դաշինքի կազմում գտնվող «Վերածնվող Հայաստան» կուսակցության պատգամավորներից երեքը՝ կուսակցության նախագահ Վահե Հակոբյանը, փոխնախագահներ Հռիփսիմե Ստամբուլյանն ու Ելենա Կիրակոսյանը դիմում են ներկայացրել` իրենց մանդատներից հրաժարվելու վերաբերյալ․ մանդատը վայր է դրել նաեւ «Հայաստան» դաշինքից Արամ Վարդեւանյանը։ Վահե Հակոբյանը պարզաբանել է, որ երկրորդ նախագահ Ռոբերտ Քոչարյանի հետ տարաձայնություններ չունեն եւ որ իրենց կուսակցությունը համաձայն չի եղել խորհրդարան վերադառնալու մասին ընդդիմության որոշման հետ։
Հարցին՝ գուցե Վահե Հակոբյանը եւս մանդատից հրաժարվում է, որովհետեւ ինքն էլ է անցնելու որեւէ քրեական գործով, Արծվիկ Մինասյանը պատասխանեց, որ չունի նման տեղեկատվություն․ «Ավելին․ իր կուսակցության հայտարարությունը փաստում է, որ եթե որեւէ պատգամավոր անձեռնմխելիության քողի տակ փորձեր պաշտպանվել, ուրեմն չպետք է մանդատը դներ։ Բայց սա ցույց է տալիս, որ իրենք այդ առումով մտածելու բան չունեն։ Մեր պայքարն անձեռնմխելիություն պահելու համար չէ, այլ հայրենիքի, եւ մեր նպատակները չեն փոխվել»։
Կարդացեք նաև
Թե ինչու ընդդիմությունը հայրենիքի համար պայքարում միեւնույն հայտարարի չեկավ, եւ «Վերածնվող Հայաստանն» այլ դիրքորոշում պաշտպանեց, Արծվիկ Մինասյանը պարզաբանեց․ «Իրենք խորհրդարանական աշխատանքում չեն պատկերացնում իրենց մասնակցությունը։ Այդ դեպքում բնականաբար ազնիվ են գտնվել եւ հայտարարել են, որ մեզ հնարավորություն են տալիս պայքարն այդ դաշտում տանել»։
Լուիզա ՍՈՒՔԻԱՍՅԱՆ
