Ադրբեջանի ԱԳՆ-ն հերքել է Ռուսաստանի ՊՆ հաղորդագրությունն այն մասին, որ Շուշիում հրադադարի ռեժիմը խախտվել է, և այդ մեղադրանքը համարել «միանգամայն անհիմն»:
Միաժամանակ, ԱԳՆ-ն ափսոսանք է հայտնել հայկական տեղանուններ չօգտագործելու զգուշացման վերաբերյալ ռուսական կողմի «քամահրական» վերաբերմունքի կապակցությամբ:
«Եվս մեկ անգամ հայտարարում ենք, որ ԱՆԹՈւՅԼԱՏՐԵԼԻ է Ադրբեջանի Հանրապետության տարածքում բնակավայրերի անունները մտացածին հայկական տեղանուններով կոչելը, այդ թվում՝ «Լեռնային Ղարաբաղի տարածք» արտահայտության օգտագործումը:
Կոչ ենք անում Ռուսաստանի Դաշնության խաղաղապահ զորակազմին պաշտոնական հաղորդագրություններում չօգտագործել նշված սխալ արտահայտությունները, հուսով ենք, որ մեր այս կոչը կընդունվի ի գիտություն: Բացի այդ, պահանջում ենք հրապարակված քարտեզում ճիշտ նշել մեր երկրի անվանումը»,- ասվում է հաղորդագրության մեջ:
Կարդացեք նաև
Ադրբեջանի ԱԳՆ-ն իր «պարտքն է համարել ևս մեկ անգամ նշել», որ խաղաղապահների կողմից հիշատակված ԼՂ տարածքը «Ղարաբաղյան տնտեսական գոտին» է, իսկ տեղեկագրում հիշատակված Մարտակերտն ու Մարտունին` Աղդերե և Խոջավենդ:
Պատրաստեց Վիկտորյա ԱՆԴՐԵԱՍՅԱՆԸ
