«Մենք եղել ենք ե՛ւ փողոցում, ե՛ւ խորհրդարանում: Խորհրդարանն ու փողոցը երբեք իրարից չենք բաժանել: Մենք մեր ռեսուրսների սահմաններում, նաեւ այլոց հետ քննարկելով՝ փորձում ենք պայքարել: Այլընտրանքային ճանապարհ չկա»,- այսօր «Հայելի» ակումբում ասաց «Հայաստան» խմբակցության պատգամավոր Արթուր Խաչատրյանը:
Նա ասաց, որ այսօր գյուղատնտեսությունը անկում է ապրում, խաղողը երբեք այսքան էժան չի մթերվել. «110 դրամ թղթի վրա 80 դրամ իրական գին է: Էկոնոմիկայի նախարարությանը ձեռք է տալիս քանդել, որ գնան իր menu.am-ում առաքիչ աշխատեն: Թուրքիայից ապրանք կբերեն, պիցցա կթխեն, կառաքեն, թուրքերի հետ մոտ են»:
Դիտարկմանը, որ Լարսում մեր վարորդները լուրջ խնդրի առաջ են, ամեն մի պատգամավորը 5 նախարար արժի, խեղդեք, թող նախարարը գա, պատասխան տա՝ Արթուր Խաչատրյանը պատասխանեց. «Նախարարը, ինչքան էլ իրեն հարց տաք, կասի՝ մենք այդ ուղղությամբ աշխատում ենք: Արդյունք չկա: Ու չկա ոչ թե նրա համար, որ քիչ ենք խեղդում, խեղդելու դիամետրը քիչ եք պահում, մարդը ի վիճակի չի այդ հարցը լուծել: Այսինքն, խեղդես, չխեղդես՝ մեկ է»:
Ըստ Արթուր Խաչատրյանի, Լարսի հարցը պետք է Երեւանից լուծել, ոչ թե Լարս գնալ ու վարորդների ձեռքը բռնել, դա նկարվելու համար է. «Պետք է Վրաստանի հետ խոսել: Հիմա Վրաստանի հետ հարաբերությունները սուտ են ասում, թե լավ են, աննախադեպ վատ են, ոչ թե լավ»:
Կարդացեք նաև
Դիտարկմանը, որ ինչո՞ւ Դիմադրության շարժման նախորդ ձախողած փորձերից հետեւություններ չեն արվում, քննադատությունները չեն ընդունում՝ Արթուր Խաչատրյանը պատասխանեց, որ շարժման շնորհիվ է, որ Փաշինյանը Ադրբեջանի հետ փաստաթուղթը չի ստորագրել. «Բազմաթիվ հարցերով կառավարությանը նեղում ենք: Ներկայացնում ենք մեր առաջարկությունները: Մի մասին դա դուր է գալիս, մի մասին դուր չի գալիս»: Ըստ նրա, եթե իրենց շարժման ձախողումը համարում են այն, որ Փաշինյանին պաշտոնանկ չեն արել, կարելի է այդ քննադատությունն ընդունել, բայց ակնկալել, որ Փաշինյանը 1-2 տարի հետո չի լինելու՝ չափազանցություն է. «Այդ մարդը հասարակության մեջ ունի հենարան՝ մեծ, փոքր, բայց ունի»:
Երբ փոխանցվեց, որ ընդդիմություն էլ ուներ հենարան, բայց մարդիկ ասում են՝ խորհրդարանում ծեծ կերան, արդեն վախեցած են իրենց պահում՝ Արթուր Խաչատրյանը բորբոքվեց. «Ո՞վ է ծեծ կերել, հլը թող մեկը կանգնի ասի, 20 հոգով 70 հոգու դեմ որ կռվում են, դա նշանակում է ծե՞ծ եմ կերել: Էդ ասողին հլը մյուս անգամ բեր կողքս, թող նայի իմ երեսին ու ասի նման բան: Ասողին կանչի, թող նայի աչքերիս: Սո՛ւտ է ասում, որովհետեւ երբ 20 հոգին 70 հոգու դեմ կռվում են, դա չի նշանակում վախեցած են: Ինքը էդքան մտահոգ էր, թող գար կանգներ ԱԺ-ի դռան դեմը, էդ 70-ից մեկի հետ էլ ինքը կռիվ աներ: Խոսելով չի, է՛: Խոսում են, թե՝ վախեցած են: Այդ քաջը, որին դու եթեր ես տվել, թող գար կանգներ ԱԺ-ի դեմը, մի հատ պատգամավորի թթու խոսք ասեր: Մենք վախեցած լինեինք, մանդատները կհանձնեինք, երկրից կփախնեինք»:
Հռիփսիմե ՋԵԲԵՋՅԱՆ
