ԱԺ աշխատանքի եւ սոցիալական հարցերի մշտական հանձնաժողովի անդամները Վիլնյուս աշխատանքային այցի ընթացքում հանդիպել են Լիտվայի խորհրդարանի՝ Սեյմի աշխատանքի եւ սոցիալական հարցերի հանձնաժողովի եւ Հաշմանդամություն ունեցող անձնանց իրավունքների կոմիտեի նախագահի ու անդամների հետ: Հանդիպման ընթացքում քննարկվել են ոլորտի վերաբերյալ բարենպաստ իրավական միջավայրի ձեւավորման եւ հետօրենսդրական վերահսկողության հարցեր:
Աշխատանքային օրենսդրության բարելավման, արդյունավետ պետական վերահսկողության, պաշտպանված աշխատանքային իրավունքի ապահովման եւ աշխատանքային վեճերի լուծման արտադատական մեխանիզների հետ կապված հարցերը քննարկվել են Աշխատանքի տեսչության, Արհեստակցական միություների կոնֆեդերացիայի, Զբաղվածության եւ սոցիալական ծառայությունների հետ հանդիպումների ժամանակ: Լիտվայի Աշխատանքի տեսչությունը համարվում է լավագույններից այս ոլորտում եւ շուրջ մեկ տարի քննում է նաեւ աշխատատեղում հոգեբանական բռնության դեպքերը:
Հավասար հնարավորությունների օմբուդսմենի գրասենյակում քննարկվել են խտրականության արգելքի եւ իրավահավասարության ապահովման իրավական հիմքերի ստեղծման անհրաժեշտությունն ու գործնական կիրառության խնդիրը:
Աշխատանքային այցի ընթացքում հանձնաժողովի անդամները հանդիպել են Լիտվայի արտաքին գործերի նախարարի տեղակալ Մանտաս Ադոմենասին եւ Լիտվա-Հայաստան բարեկամական խմբի ղեկավար Ռայմունդաս Լոպատային:
Կարդացեք նաև
Հանդիպումների ընթացքում անդրադարձ է եղել հայ-լիտվական հարաբերությունների առկա մակարդակին եւ ավելի խորացնելու անհրաժեշտությանը: Պատվիրակության անունից հանձնաժողովի նախագահ Հերիքնազ Տիգրանյանը շնորհակալություն է հայտնել Լիտվայի հասցեական դիրքորոշման եւ Հայաստանի նկատմամբ Ադրբեջանի ագրեսիան դատապարտող հայտարարության համար, ինչպես նաեւ հույս է հատնել, որ ժողովրդավար Հայաստանի կողմից առաջ մղվող խաղաղության օրակարգը սատարում կգտնի միջազգային հանրության, այդ թվում՝ բալթյան երկրների կողմից:
Աշխատանքային այցին մասնակցել են նաեւ ՀՀ աշխատանքի եւ սոցիալական հարցերի նախարարի տեղակալ Ռուբեն Սարգսյանը եւ Միասնական սոցիալական ծառայության պետի տեղակալ Թամարա Թորոսյանը:
Այցը կազմակերպվել էր Միջազգային հանրապետական ինստիտուտի աջակցությամբ:
ԱԺ
