Այսպիսի քննարկումները գուցե կարևոր են, բայց 2 տարուց ավելի է՝ մենք հանդուրժում ենք այս դավադիր իշխանությանը: Անկեղծ խոսենք, մենք չկարողացանք ստեղծել դիմադրության շարժում և այժմ արհամարհված ենք ոչ միայն պարտության պատճառով, այլև այն պատճառով, որ պարտության պատասխանատու իշխանությունը մինչև հիմա պետության ղեկին է։ Այս մասին այսօր ասաց իրավապաշտպան Ավետիք Իշխանյանը՝ «Համախմբում» նախաձեռնության կողմից կազմակերպված «Խաղաղության» համաձայնագիր․ սահմանադրականության հարցն ու միջազգային իրավաքաղաքական հետևանքները» խորագրով համաժողովի ընթացքում:
Նրա գնահատականով, այսպիսի վիճակում մենք ապագա չունենք, եթե օր առաջ չհամախմբվենք եւ չհեռացնենք գործող իշխանությանը։
«Հայաստանի իշխանությունները ոչ թե սխալվել են, այլ սա դավադրություն էր, իսկական դավադրություն։ Խաղաղության պայմանագրի վերաբերյալ ես ներքին համոզվածություն ունեմ, որ Նիկոլ Փաշինյանն ասել է՝ Արցախը հանձնենք, ու հանգիստ թողեք իշխեմ Հայաստանում, իմ բռնապետական համակարգով հավերժ իշխեմ։ Նա խաղաղության պայմանագիր ասելով հենց սրան է ձգտում և այժմ անակնկալի է եկել, որ հակառակորդն ավելին է ուզում։ Նա հիմա ցայտնոտի մեջ է»,– ասաց Իշխանյանը։
Լուսինե ՄԱՐԳԱՐՅԱՆ
