Նորարարությունները ստեղծել են մասնավոր համակարգում, երկրների մեծ մասում պետական գնումների ընդամենը 45 տոկոսն է իրականացվում էլեկտրոնային ճանապարհով, նորարական քաղաքականությունը յուրաքանչյուրի մոտ տարբեր կերպ է ընկալվում, ինչ է նշանակում նորարարության քաղաքականությունը պետության համար…, միտքը չկարողացավ ավարտել ՄԱԿ-ի Եվրոպական տնտեսական հանձնաժողովի գլխավոր քարտուղարի տեղակալ Դմիտրի Մարիյասին:
«Խնդրում եմ բոլորդ ոտքի կանգնեք»,-տարածվող խոսակցությունների ու խառնաշփոթի միջից լսվեց մի երիտասարդի ձայն,- «նախագահն է գալիս»: Մարիյասին, որը Հայաստան էր ժամանել հատուկ այսօր, «Նորարարությունը՝ գործնականում. մարդիկ՝ կենտրոնում» հանրային ոլորտի նորարարության ֆորումին մասնակցելու համար, ոչ միայն ստիպված եղավ ընդհատել զեկույցը, այլ նույնիսկ ամբիոնը զիջել ՀՀ նախագահ Վահագն Խաչատուրյանին:
Խաչատուրյանը կարևորեց հանրային ոլորտում ԿԶՆ նորարարական կենտրոնի հնգամյա գործունեությունը և ոլորտի նորարարությունն առաջնորդելու կարողությունը: Նրա խոսքով, իրենք հաճախ որոշումներ են կայացնում ՝ չուսումնասիրելով տվյալ ոլորտի խնդիրները, երբեմն նույնիսկ հաշվի չառնելով վիճակագրական տվյալները: Այդ առումով, ՀՀ նախագահը բարձր գնահատեց այս կենտրոնի վերլուծական, հետազոտական բաղադրիչը՝ տեղեկացնելով, որ ընդամենը 5 տարվա ընթացքում կենտրոնը 13 բնագավառում 20 ուսումնասիրություն է կատարել: «Մեր զարգացման ապագան թվայնացման մեջ է»,-ամփոփեց ՀՀ նախագահը:
Իսկ ընդհատված զեկույցը շարունակող ՄԱԿ-ի Եվրոպական տնտեսական հանձնաժողովի գլխավոր քարտուղարի տեղակալն էլ հայտարարեց, թե այլևս ազգ-պետությունների ժամանակը չէ, այդպիսիք հերթով խարխլվում են, կարևորը ցանցերն են և կառավարությունները պետք է աշխատեն ցանցերի հետ: Բացի այդ, նա նշեց. «ԿԶՆ նորարարական կենտրոնի մոդելը ոգեշնչել է կայուն զարգացման մարտահրավերների հետ աշխատող աշխարհի ամենամեծ և ամենաարագ ցանցին՝ ՄԱԶԾ աքսելերատոր կենտրոններին, ինչպես նաև հիմք է դրել Հայաստանի հանրային կառավարման ոլորտում նորարարությունների տարածմանը՝ ունենալով հավակնոտ նպատակ կառուցել լայնախոհ և ստեղծագործ հանրային ծառայողների համայնք, որը փոխակերպում է որոշումների կայացման գործընթացը պետական հատվածում»:
Կարդացեք նաև
Լուսինե ՄԱՐԳԱՐՅԱՆ
