Տարիներ շարունակ Տավուշի մարզկենտրոն Իջևանի բնակիչները` հատկապես ամռան ամիսներին, բախվում են խմելու ջրի սակավության խնդրին: Վերջին շրջանում Ենոքավան բնակավայրում սկսված շինարարական աշխատանքներից ելնելով, կարծես թե ուրվագծվում է խնդրի լուծումը: Այս մասին Aravot.am–ի հետ զրույցում նշեց «Վեոլիա Ջուր» ընկերության Իջևան տեղամասի շահագործման տեղամասի պետ Վոլոդյա Ղալումյանը:
«Իջևան տեղամասի ջրամատակարարման համակարգը ՀՀ-ում առկա ամենադժվար համակարգերից մեկն է: Խնդիրը կապված է ջրաղբյուրների հետ, քանի որ դրանք մակերևույթային են և դրա պատճառով ջրաքանակը խիստ տատանվում է: Եղած ջրաղբյուրների սակավության պատճառով «Վեոլիա Ջուր» որոշել է իջևանցիների խմելու ջրի հարցը կարգավորել Լաստիվերի «Պաղ ջուր» կոչվող գետակից ջուր վերցնելով»,- նշեց Ղալումյանը: Ավելի քան 2 ամիս է, ինչ շինարարական աշխատանքներն սկսվել են: Վոլոդյա Ղալումյանը հավելեց, որ սկսված ծրագիրը կոչել են «փրկության ծրագիր»: Նոր ջրաղբյուրը կապահովի մեկ վայրկյանում 30 լ. ջրաքանակ:
Շինարարական աշխատանքներին զուգահեռ կառուցվում է նաև ջրի մաքրման կայան, որտեղ կտեղադրվեն գործարանային արտադրության 2 մաքրման ֆիլտրեր: «Փրկության ծրագիրն» իրականացնելու համար «Վեոլիա Ջուր» ընկերությունը կծախսի մոտ 205 մլն. դրամ: Արդյունքում վերջնականապես կլուծվի Իջևանի 7000 բաժանորդի խմելու ջրի խնդիրը:
Կարդացեք նաև
Լիա ՃԱՂԱՐՅԱՆ
