Նոյեմբերի 23-ին Մարդու իրավունքների պաշտպանի աշխատակազմի և Միջազգային իրավական հարցերով ՀՀ ներկայացուցչի գրասենյակի ներկայացուցիչների միջև տեղի է ունեցել աշխատաժողով «ԵԽ Նախարարների կոմիտեի կողմից ՄԻԵԴ վճիռների կատարման վերահսկողություն/Կանոն 9» թեմայով։ Աշխատաժողովին մասնակցել է նաև ներկայացուցիչ ՀՀ փաստաբանների պալատից:
Միջազգային իրավական հարցերով ՀՀ ներկայացուցչի գրասենյակի ներկայացուցիչները խոսել են Մարդու իրավունքների եվրոպական դատարանի վճիռների կատարման փուլում դերակատարների ներգրավման գործընթացների, մասնավորապես՝ Եվրոպայի խորհրդի Նախարարների կոմիտե հատուկ դիրքորոշումների ներկայացման փուլերի և ընթացակարգերի մասին:
ՄԻՊ ներկայացուցիչները ներկայացրել են Պաշտպանի մանդատը Մարդու իրավունքների եվրոպական դատարանի վճիռների կատարման փուլում Պաշտպանի ներգրավման ոլորտում, ինչպես նաև կիսվել են Կանոն 9-ի շրջանակում ԵԽ Նախարարների կոմիտե ներկայացված Պաշտպանի հաղորդակցությունների լավագույն փորձով:
Հանդիպման ընթացքում կողմերը քննարկման առարկա են դարձրել նաև ՄԻԵԴ վճիռների կատարման փուլում Պաշտպանի ներգրավման, ինչպես նաև ՄԻԵԴ ներկայացված գանգատներով որպես երրորդ կողմ հանդես գալու վերաբերյալ գործնական հարցեր:
Կարդացեք նաև
Կողմերը խոսել են նաև ԵԽ Նախարարների կոմիտեի Կանոնների վերջին զարգացումների, ինչպես նաև պետության կողմից ՄԻԵԴ վճիռների կատարման գործընթացի ներկա իրավիճակի մասին։
Հանդիպման ավարտին երկու գրասենյակի ներկայացուցիչները շնորհակալություն են հայտնել և ձեռք են բերել շարունակական համագործակցության պայմանավորվածություն՝ նախանշելով համագործակցության հնարավոր ձևաչափերը:
Միջոցառումն իրականացվել է «Հաշվետու հաստատություններ և մարդու իրավունքների պաշտպանությունը Հայաստանում» ծրագրի շրջանակներում։ Ծրագիրը ֆինանսավորվում է Եվրոպական միության կողմից և իրականացվում է ՄԱԶԾ-ի, ՅՈՒՆԻՍԵՖ-ի, ՄԱԿ-ի Բնակչության հիմնադրամի և ԵԱՀԿ-ի կողմից։
ՀՀ ՄԻՊ հասարակայնության հետ կապերի բաժին
