«Մենք հիմա փակ շրջանի մեջ ենք, ցանկացած նոր նշանակում՝ նշանակում է վատ նշանակում։ Այդ տրամաբանության մեջ է Հայաստանում ամեն ինչ գնում»,- «Հայելի» ակումբում ասաց ռեժիսոր Հովհաննես Գալստյանը՝ անդրադառնալով Մնացական Մարտիրոսյանի նշանակմանը Հակակոռուպցիոն դատարանի դատավորի պաշտոնում։
Ապա անդրադարձավ իր խնդրին՝ ասելով, որ որպես առնչվող անձ ներգրաված է մի գործում․ «Իդեալական կոմեդիկ իրավիճակ է․․․Ես հատուկ բերել եմ ծանուցագիրը, որ այստեղ կարդամ»:
Նա հիշեցրեց, որ Հայաստանի ազգային կինոկենտրոնը քրեական գործ էր հարուցել իմ դեմ․ «Դա գիտեն բոլորը՝ շուկայում, մեր սուպերմարկետում, մասիվում։ Այդ քրեական գործը հարուցվել էր 2018-19թ, 2020թ կարճվել էր հանցակազմի բացակայության հիմքով։ Բայց Հայաստանի ազգային կինոկենտրոնը բողոքել է դատախազին՝ իբր քննիչները լավ չեն վարել այս գործը։
Դատախազը մերժել է 4 ամիս հետո։ Կինոկենտրոնը չի հանգստացել, նորից դիմել է դատարան, առաջին ատյանի դատարանը մերժել է բողոքը, գնացել են Վերաքննիչ, Վերաքննիչից էլ հետ են ուղարկել առաջին ատյանի դատարան, որովհետեւ քննիչները չեն իրականացրել դատաապրանքագիտական փորձաքննություն․․․ Ես կոչ եմ անում եւս 15 փորձաքննություն իրականացնել, որովհետեւ ինձ դուր է գալիս, որ այս պրոցեսը շարունակվում է»:
Կարդացեք նաև
Հովհաննես Գալստյանը հեգնանքով հավելեց․ «Փաստորեն, մի պետական ՊՈԱԿ դատական հայց է ներկայացնում Քննչական կոմիտեի ու մի դատախազի դեմ, որ մենք 4 տարի է ընկած ենք մի ռեժիսորի հետեւից, որին դուք չեք բռնում»։
Գոհար ՀԱԿՈԲՅԱՆ
