Այսօր ՀԱՊԿ-ից դուրս գալու պահանջով, ինչպես նաեւ ընդդեմ ՌԴ նախագահ Վլադիմիր Պուտինի՝ Հայաստան կատարած այցի, բողոքի ցույց էր կազմակերպվել Ազատության հրապարակում:
Քաղաքագետ Ստեփան Գրիգորյանն ասաց, որ իրենք վերլուծություններ են անում, թե ինչո՞ւ ՌԴ-ն չի կատարում իր պայմանագրային պարտավորությունները, ինչո՞ւ է հիմա Թուրքիայի, Ադրբեջանի հետ, մինչդեռ Հայաստանը 30 տարի տարբեր կառույցներում քվեարկում էր այնպես, ինչպես ուզում էր ՌԴ-ն. «Մենք դա անում էինք՝ ակնկալելով, որ մեր անվտանգությունը ՌԴ-ն կպաշտպանի: Չպաշտպանեց: Այն պրոբլեմները, որոնք տեսնում ենք Ուկրաինայում ու որոնք առաջացան Պուտինի առջեւ, դա Աստծո պատիժն է ու քաղաքագիտության հետ կապ չունի, եթե դու դաժանաբար քցում ես քո ռազմավարական պարտնյորին, որը ՄԱԿ-ի ամբիոնից, ԵԽ-ում քվեարկում էր հօգուտ ՌԴ-ի, ուղարկեց Սիրիա խաղաղապահներ՝ լեգիտիմացնելով Սիրիայում ՌԴ-ի ներկայությունը, դրա դիմաց ոչինչ չստացավ:
Մեզանից ուզում են խլել մեր անկախությունը, չպետք է թույլ տանք: Հասարակ բան՝ վարչապետը գնաց ՄԱԿ, ամբիոնից խոսեց, սաղ մեր դարդերը, ցավերը բերեց դրեց սեղանին, պարզվեց՝ մենք ունենք բարեկամ ժողովուրդներ, Ֆրանսիան, ԱՄՆ-ն մեզ հետ են՝ կոնկրետ հարցերում: Անկախության ինստիտուտը բարձրագույն արժեք է: Իսկ թե ինչու է Վլադիմիր Պուտինը գալիս Հայաստան, չեմ հասկանում: Ես հենվում եմ իր հայտարարությունների վրա, ի՞նչ ասեց նա պատերազմից հետո՝ նոյեմբերի 9-ից հետո: Ասեց՝ Լեռնային Ղարաբաղը եղել է եւ պետք է լինի Ադրբեջանի մաս, ոչ միայն 7 շրջանները: Առաջինը՝ ինքը ո՞վ է, որ որոշում ընդունի՝ հայ ժողովրդի հայրենիքը որ երկրի մասն է: Եթե ինքը սիրում է Ադրբեջանը, Թուրքիան, դա իր գործն է, բայց այստեղ ինչի՞ է գալիս: Իրեն այստեղ չեն սպասում: Հայ ժողովուրդը շատ խիստ է տրամադրված պուտինյան ՌԴ-ի նկատմամբ»:
Կարդացեք նաև
Հռիփսիմե ՋԵԲԵՋՅԱՆ
