Այսօր ՀԱՊԿ-ից դուրս գալու պահանջով, ինչպես նաեւ ընդդեմ ՌԴ նախագահ Վլադիմիր Պուտինի՝ Հայաստան կատարած այցի, բողոքի ցույց էր կազմակերպվել Ազատության հրապարակում:
Քաղաքագետ Արմեն Հովհաննիսյանն իր ելույթում ասաց. «Այստեղ հարցնում են, թե Պուտինը, Լուկաշենկոն ինչի են եկել: Եկեք մի այլ տեսակետից նայենք՝ ո՞ւր կարող էին իրենք գնալ: Քանի՞ երկիր կա աշխարհում, որ նմանատիպ հանցագործներին կարող է ընդունել, քանի՞ երկիր է հետը տալիս առնում, բանակցում ու խոսում»:
Նրա խոսքով՝ ՀԱՊԿ-ը «լուկաշենկոների» ակումբ է, «85% ձայն ստացած տոկաեւների», «զանգվածային սպանություններ կազմակերպած պուտինների» ու այնտեղ անհնար է անվտանգություն գտնել, առավել եւս՝ անկախություն:
Ըստ նրա, հիմա Պուտինը եկել է՝ առաջարկելու, որ Արցախը գաղութանա, իսկ ՀՀ-ն ծնկի գա ու լիկվիդացիայի ենթարկվի. «ՀՀ-ում աշխարհայացքային հեղափոխություն է կատարվում: 10 տարի առաջ տասից երկուսն էին համամիտ մեզ հետ, 8-ը հայտնի հեքիաթն էին պատմում՝ բա ինչ կլինի մեզ, հետ, բա որ Թուրքիան հարձակվի: 2020-ին, երբ Թուրքիան հարձակվեց Ադրբեջանի հետ, մենք ընտրել էինք անվտանգության, պաշտպանության ամենավատ միջոցը, որը պատմականորեն հնարավոր էր: Այսօր մեր քաղաքացիների աչքերը բացված են ու բոլորին արդեն պարզ է, որ առանց ՌԴ-ի ու նմանատիպ տոքսիկ կազմակերպությունների՝ ՀԱՊԿ, ԵԱՏՄ, մենք կկարողանանք սեղմել օդում կախված այն ձեռքերը, որոնք մեկնել են մեր առաջ՝ Ֆրանսիայի, ԱՄՆ-ի առաջարկությունը»:
Կարդացեք նաև
Հռիփսիմե ՋԵԲԵՋՅԱՆ
