Երեւանում այսօր ընթացող ՀԱՊԿ արտաքին գործերի նախարարների խորհրդի, պաշտպանության նախարարների խորհրդի, անվտանգության խորհրդի քարտուղարների կոմիտեի համատեղ նիստի արդյունքում 24 փաստաթուղթ է ստորագրվելու։ Այս մասին հայտարարեց ՀԱՊԿ գլխավոր քարտուղար Ստանիսլավ Զասը` տեղեկացնելով, որ փաստաթղթերն արդեն իսկ անցել են անհրաժեշտ գործընթացներով եւ համաձայնեցվել, երեկ բերվել վերջնական տեսքի։ Ապա Ստանիսլավ Զասը նշեց՝ հաշվի առնելով այն փաստը, որ միջազգային գործընթացները վերջին շրջանում դրսեւորվում են հատուկ սրությամբ, այս համատեղ նիստը հատուկ նշանակություն է ձեռք բերում։
«Արեւելյան Եվրոպայի տարածաշրջանում ՆԱՏՕ-ի երկրները զորամիավորումներ են տեղակայում, կատարելագործում են ռազմական ենթակառուցվածքները՝ դրանք ավելի մոտեցնելով ՀԱՊԿ պատասխանատվության գոտու արեւմտյան սահմաններին։ Բնականաբար, սա լրացուցիչ մարտահրավեր է ստեղծում մեր կառույցի համար։ Հակամարտության սրացման միտումներ կան, այդ թվում՝ այլ պետությունների ներգրավմամբ»,-շեշտեց Զասը։
Անդրադառնալով Հարավային Կովկասի տարածաշրջանին՝ նա ասաց․ «Դրական դեր են խաղում ՀՀ կառավարության եւ այլ մասնակիցների ջանքերը՝ խաղաղության պայմանագրին հասնելու, սահմանների իրավական ճշգրտման, տրանսպորտային կոմունիկացիաների ապաշրջափակման ուղղությամբ։ Սրա հետ միաժամանակ պահպանվում է լարվածությունը ՀՀ-Ադրբեջան սահմանին։ Այն տեղեկատվությունը, որը մենք ամեն օր ստանում ենք ՀԱՊԿ-ում, փաստում է, որ գրեթե ամեն օր ՀՀ-Ադրբեջան սահմանին կրակոցներ են լինում։ ՀՀ-ին սպառնացող վտանգների վերաբերյալ ՀԱՊԿ-ի երեք նիստ է կայացել։ Ընդհանուր առմամբ համաձայնեցված է հավաքական անվտանգության ընդլայնման վերաբերյալ նախագիծը՝ Հայաստանին համատեղ օգնություն ցուցաբերելու առնչությամբ։ Դա հիմնված է ՀԱՊԿ մշտադիտարկման խմբի տվյալների վրա»։
Լուիզա ՍՈՒՔԻԱՍՅԱՆ
