«Ինչքան էլ փորձեն այդ փաստաթուղթը նսեմացնել, դա անժամանցելի, անբեկանելի ուժի մեջ գտնվող և կատարման համար պարտադիր փաստաթուղթ է»,- Երևանում հրավիրված ՀԱՊԿ-ի գագաթաժողովին ընդառաջ Գարեգին Նժդեհի արձանի մոտ անցկացվող հավաքի ժամանակ հայտարարեց Ազգային ժողովրդավարական բևեռի (ԱԺԲ) խորհրդի անդամ Արա Պապյանը՝ անդրադառնալով Վիլսոնյան իրավարար վճռին։
Նոյեմբերի 22-ը Վիլսոնյան իրավարար վճռի կայացման օրն է։
Արա Պապյանը հայտարարեց՝ իրենց պահանջներից մեկը դեօկուպացիան է ու շարունակեց․ «Հայաստանը պետք է ազատագրվի, քանի որ օկուպացվել է տասնամյակներ իր վեր։ Մեզ համար և′ ԼՂ-ի հարցի լուծումը, և′ Հայաստանի տարածքային ամբողջականության վերահաստատումն է այն հիմնական մայրուղին, որով լուծվելու են բոլոր խնդիրները։ ՀՀ-ի պետականության վերականգնումը և ինքնիշխանության ճանապարհով տարածքային ամբողջականության վերահաստատումն ամենահեռանկարային և խաղաղ լուծման ճանապարհն է։ Փորձ են անում ցույց տալ՝ իբր ԱԺԲ-ն ծայրահեղական է։ Չի կարող սեփական հայրենիքի հզորացմանը ձգտող ուժը լինել ծայրահեղական։ Ամեն քաղաքացի պարտավոր է իր անկախության և տարածքային ամբողջականության համար պայքարել»։
Արա Պապյանն ասաց՝ վստահ է, որ շատ շուտով կունենանք Վիլսոնյան իրավարար վճռի՝ ավելի արդի, քաղաքական գործածությունը։
Կարդացեք նաև
Տաթև ՀԱՐՈՒԹՅՈՒՆՅԱՆ
