Երևանի քաղաքապետարանը գնման հայտ է ներկայացրել 13,5 միլիոն դրամով մարդատար ավտոմեքենա ձեռք բերելու համար, արդյո՛ք դա ծառայողական մեքենա է մեկ անձի համար, ու՞մ համար է դա ձեռք բերվում և որն է դրա հրատապությունն ու անհրաժեշտությունը, Երևանի ավագանու այսօրվա նիստի ժամանակ Երևանի քաղաքապետ Հրաչյա Սարգսյանին հարց ուղղեց ավագանու անդամ Իզաբելլա Աբգարյանը:
«Գումարի մեծությունը կարծում եմ տեխնիկական պայմանների հետ է կապված, բայց ընդհանուր պատկերն այս է: Երևան համայնքում, քաղաքապետարանում մենք ունենք բազմաթիվ ավտոմեքենաներ, որոնց վրա մենք ամեն տարի ծախս ենք անում և կան ավտոմեքենաներ, որոնց վրա այդ ծախսը նպատակահարմար չի, եթե ամեն տարի ամեն մեքենայի վրա, պայմանական 2 մլն դրամ ենք ծախսում և այդ մեքենայի տարիքը 10 տարի է, նշանակում է, որ մենք կարող ենք ձեռ բերել նոր ավտոմեքենա և այդ նոր ավտոմեքենաների շրջանակում ծախսն ավելի քիչ կլինի: Եթե չեմ սխալվում այդ ավտոմեքենան էլեկտրական ավտոմեքենա պետք է լինի: Կոնկրետ անձի կետ կապված, կոնկրետ որևէ մեկի համար չենք ձեռք բերում այդ ավտոմեքենաները»-ասաց քաղաքապետը՝ ավելացնելով, որ քաղաքապետարանի ավտոպարկը թարմացնելու մտադրություն ունեն։
Լուսինե ՄԱՐԳԱՐՅԱՆ
