«Միացեք ստորագրահավաքին և փրկեք Վարուժան Ավետիսյանի կյանքը», «Վարուժանը մեր իմունիտետն է», «Ազատություն Վարուժանին»,- Ազգային ժողովրդավարական բևեռի (ԱԺԲ) երիտասարդական թևի ներկայացուցիչներն այս վանկարկումներով ստորագրահավաք և նստացույց են իրականացնում «Նուբարաշեն» քրեակատարողական հիմնարկում գտնվող Վարուժան Ավետիսյանին քաղաքացիական հիվանդանոց տեղափոխելու պահանջով:
Ինչպես արդեն տեղեկացրել ենք, ոստիկանները թույլ չտվեցին, որ ԱԺԲ երիտասարդներն ու քաղաքացիներն իրենց նստացույցն անեն ՀՀ արդարադատության նախարարության շենքի մոտ՝ պահանջելով նստացույց իրականացնել շենքի դիմացի մայթին:
Հիշեցնենք՝ երեկ ԱԺԲ-ն հայտարարություն տարածեց, որում Վարուժան Ավետիսյանի հիվանդության հետ կապված մասնավորապես նշվում է. «Հայաստանի պայմաններում կատարված բոլոր հնարավոր տեսակի հետազոտությունները, ցավոք սրտի, հիվանդության հստակ հարուցիչը այդպես էլ հայտնաբերել չեն կարողացել, ինչի պատճառով Վարուժան Ավետիսյանի վերջնական ախտորոշումը և բուժումը Հայաստանի պայմաններում դարձել է անհնար»:
Նստացույցի մասնակիցները վստահեցրին՝ ինչքան շատ լինենք, այնքան շուտ կհասնենք մեր նպատակին: Նրանք նաև ստորագրահավաք են իրականացնում Վարուժան Ավետիսյանին քաղաքացիական հիվանդանոց տեղափոխելու պահանջով:
Կարդացեք նաև
Անդրադառնալով ոստիկանների գործողություններին՝ նստացույցի մասնակիցներից Հասմիկն ասաց. «Սկզբում ոստիկանները խոչընդոտեցին մեր նստացույցի իրականացմանը: Զգուշացրին, որ եթե մենք նստացույց անենք արդարադատության նախարարության տարածքում, մեզ բերման կենթարկեն: Իրենք առաջարկեցին, որ տեղափոխվենք, քանի որ նախարարությունում ինչ-որ միջոցառում է կազմակերպվել, դրա համար մեզ չեն թույլատրում, որ չխանգարենք իրենց անդորրը: Հրամանն այդպես էր տրված: Մենք չէինք հրաժարվի մեր գաղափարից, ուստի որոշակի ընդհանուր եզրեր փորձեցինք գտնել, որ իրենց նպատակին չհասնեն: Եթե այսօր սկսել ենք այստեղից, չի նշանակում, որ մնացած բոլոր օրերը այստեղից ենք շարունակելու: Մենք այնքան ենք մնալու, մինչև հասնենք մեր նպատակին»:
Տաթև ՀԱՐՈՒԹՅՈՒՆՅԱՆ
