Մեկ տարի առաջ՝ 2021 թվականի նոյեմբերի 9-ին, ՀՀ արտաքին գործերի փոխնախարար նշանակված Պարույր Հովհաննիսյանը չնայած նախկինների օրոք աշխատած պրոֆեսիոնալ դիվանագետ է եւ ԱԳՆ-ում է 1995 թվականից, սակայն իրեն պահում է Նիկոլ Փաշինյանի կառավարության անդամի պես։
Երբ ճեպազրույցն ավարտվեց, փորձեցինք Հովհաննիսյանին առանձին մի քանի հարց ուղղել
– Խնդիրը ո՞րն է՝ Ձեր ձեւակերպմամբ, միայն ֆիզիկական անվտանգության խնդիր է։
– Բոլորը՝ ամբողջ այդ սպեկտրը խնդիրների։ Մենք ունենք Ղարաբաղի հայերի հետ կապված մի ամբողջ խնդիրների բուկետ։
Կարդացեք նաև
– Իսկ ինչո՞ւ եք օգտագործում «Ղարաբաղ» ձեւակերպումը, այլ ոչ թե «Արցախի Հանրապետություն», երբ որ մինչեւ 2020 թվականն «Արցախի Հանրապետություն» էր բոլորիս համար։
– Դե, երկուսն էլ օգտագործվում էր՝ թե՛ «Լեռնային Ղարաբաղ», թե՛ «Արցախ», դա ընդունված է նաեւ նույն Արցախի Սահմանադրությամբ։
– Շատերն ասում են, որ Արցախն ինքնորոշվել է դեռ վաղուց, իսկ 1991 թվականի դեկտեմբերի 10-ի հանրաքվեով Արցախի ժողովուրդն արդեն իր ճակատագիրը որոշել է, որ ինքն անկախ պետություն է։ Մենք հիմա ի՞նչ ինքնորոշման հարց ենք լուծում։
– Դա նաեւ ենթադրում է միջազգային ճանաչում։ Ինքնորոշման ճանաչումը միայն չի որոշվում մեկ, երկու կամ երեք քայլով։ Դա քայլերի մի ամբողջ շարան է, որի մեջ մտնում է նաեւ միջազգային հանրության կողմից այդ ինքնորոշման ճանաչումը։
– Երբ Խորհրդային Միությունից անկախացան Հայաստանը, Ադրբեջանն ու Արցախը, այդ ժամանակ Արցախն Ադրբեջանի կազմում չէր։ Ինձ հետաքրքիր է Ձեր դիրքորոշումը՝ Արցախը երբեւէ Ադրբեջանի կազմում եղե՞լ է։
– Դուք գիտեք, որ այդ հարցը գնում է դեռեւս առաջին աշխարհամարտից հետո, այսինքն՝ միշտ էլ եղել է իրավիճակ, քննարկվել է թե՛ Փարիզում՝ բանակցությունների ընթացքում, թե՛ Սովետական Միության ընթացքում։
– Դուք ասացիք՝ 1995 թվականից եք ԱԳՆ-ում, ու վստահ եմ՝ գիտեք, որ Հայաստանի իշխանությունների պաշտոնական դիրքորոշումը մշտապես եղել է այն, որ Արցախը երբեք չի եղել Ադրբեջանի կազմում ու չի լինելու։ Հիմա ինչո՞ւ է ինչ-որ բան փոխվել Հայաստանի իշխանությունների վարած քաղաքականության եւ դիրքորոշման մեջ։
– Ես նորից ասացի, որ մեր դիրքորոշումը նույնն է, ինչ որ կա։ Մենք երբեւիցե չենք արել մի հայտարարություն, որը կհակասեր հիմիկվանին։ Բայց խոսքը գնում է նաեւ… Ես նոր նշեցի՝ ինչ է անհրաժեշտ դրա համար. միջազգային կազմակերպությունների կողմից համապատասխան քայլերի իրականացումը։
Վահե ՄԱԿԱՐՅԱՆ
Հոդվածն ամբողջությամբ՝ «Հրապարակ» օրաթերթի այսօրվա համարում:
