ՀՀ կառավարության այսօրվա նիստում Երևանը պաշտոնապես ներկայացնող փոխքաղաքապետ Տիգրան Ավինյանը վթարային շենքերի խնդրի լուծման նոր ծրագիր առաջարկեց:
Նրա խոսքով, իրենք պարզ բանաձև են առաջարկում կառուցապատողներին, ովքեր կներգրավվեն գործընթացում և առկա վթարային շենքերի տեղերում այլ շենքեր կկառուցեն` ընթացքում լուծելով վարձակալության, այնուհետև բնակարան տրամադրելու հարցերը: Ավինյանը տեղեկացրեց, որ Աջափնյակ վարչական շրջանն ամենահարուստն է 4-րդ կարգի վթարային շենքերի առումով, իսկ առհասարակ Երևան քաղաքում 4-րդ կարգի վթարային 13 բազմաբնակարան շենք կա, 100-ից ավելի 3-րդ կարգի շենք:
«3-րդ կարգի վթարային շենքերի համար կանցնենք կոմպլեքս լուծմանը` թաղամասային տրամաբանությանը»,– ասաց Ավինյանը։
Վարչապետ Նիկոլ Փաշինյանն էլ իր հերթին հայտնեց` պետք է ամեն ինչ արվի, որ քաղաքացիների իրավունքները լիարժեք պահպանվեն, նրանք բնակարան ստանան նորակառույց շենքում։ Վարչապետի խոսքով` 4-րդ կարգի վթարային շենքերում մարդիկ են ապրում, ինչը մեծ սպառնալիք է բոլորի համար։
Կարդացեք նաև
«Աստված չանի, մի դեպք լինի` բոլորը կասեն` ո՞ւր էր նայում կառավարությունը։ Մարդկանց իրավունքները պաշտպանելով` որոշակի հարկադրանքի մեխանիզմներ էլ պետք է ստեղծենք։ Այս հարցերը պետք է արագ լուծվեն. մարդկանց ապրելու իրավունքը լուծվե՞ց` շենքը ժամերի ընթացքում պիտի տեղում չլինի»,– ասաց նա։
Կառավարությունը հավանություն տվեց Երևան քաղաքի Արզումանյան փողոցի թիվ 10 և 17 հասցեների շենքերը 4-րդ կարգի վթարային շենքերը գերակա շահ ճանաչելու նախագծին։ Այդ շենքերը կքանդվեն, տեղում նորերը կառուցվեն։
Լուսինե ՄԱՐԳԱՐՅԱՆ
