«Ես մանրամասն ինֆորմացիա չունեմ, չեմ կարող մեկնաբանել՝ ի՞նչ աշխատանքներ են կատարվում»,- խորհրդարանում լրագրողների հետ զրույցում ասաց ՀՀ տարածքային կառավարման եւ ենթակառուցվածքների նախարար Գնել Սանոսյանը՝ պատասխանելով հարցին, որ Հայաստանի տարածք ներխուժած ադրբեջանական ԶՈՒ ստորաբաժանումները ոչ միայն այդ հատվածներում ամրաշինական աշխատանքներ են կատարում, այլ ճանապարհ են կառուցում Ջերմուկի հատվածում՝ Սյունիքին մոտենալու համար: Նա ենթադրեց, որ գուցե ինչ-որ բաներ արվում են՝ «որ այնտեղ են, իրենց սնունդ տանել-բերելու համար», ու դատապարտեց այդ քայլերը՝ հիշեցնելով իշխանության տեսակետը, որ ադրբեջանական ԶՈՒ-ը պետք է դուրս գան ՀՀ-ի բռնազավթած տարածքներից: Գնել Սանոսյանը վստահ է, որ ՀՀ իշխանությունը իր դիրքորոշումը հստակ ներկայացրել է ու դրանով է պայմանավորված այն, որ տարբեր գործընկերներ անընդհատ բարձրաձայնում են այդ մասին:
Մամուլում տեղեկություններ եղան, որ Հայաստանի եւ Ադրբեջանի միջեւ խաղաղության պայմանագիրը հնարավոր է Վրաստանում կնքվի. Գնել Սանոսյանն ասաց, որ կնքման վայրի հետ կապված տեղեկություններ չունի: Նաեւ դժվարացավ համաձայնագրի կնքման ժամկետներ նշել, միայն ասաց, որ բավական աշխատանք կատարվել է եւ եթե բավարար կամք լինի, գոնե գլխավոր կետերի վերաբերյալ, հնարավոր է համաձայնությունների գալ, քանի որ դրանց վերաբերյալ հայկական կողմը իր տեսակետերը շատ հստակ միշտ արտահայտել է:
Հայկական անկլավների, սահմանազատման եւ սահմանագծման մասին Գնել Սանոսյանի տեսակետները՝ տեսանյութում:
Կարդացեք նաև
Նելլի ԳՐԻԳՈՐՅԱՆ
