Արցախի հանրապետության նախագահի միջազգային հարաբերությունների խորհրդական Նելլի Բաղդասարյանը երեկ Ֆրանսիայի Սենատի ընդունած բանաձևը կարևոր նշանակության փաստաթուղթ է համարում, որը հակազդեցություն է Ադրբեջանի ագրեսիայի շարունակականությանը:
Հիշեցնենք, երեկ Ֆրանսիայի Հանրապետության Սենատը՝ 296 «կողմ» ձայներով ընդունեց Հայաստանին աջակցող և Ադրբեջանի նկատմամբ պատժամիջոցներ առաջարկող բանաձև։ Ֆրանսիան ԵԱՀԿ Մինսկի խմբի համանախագահ երկիր է։
«Փաստաթուղթը լրացուցիչ փաստական հիմք կարող է ծառայել Ադրբեջանի դեմ միջազգային իրավական գործընթացներում: Բանաձևը բովանդակային առումով լիարժեք է. ի թիվս բազմաթիվ հարցերի՝ բանաձևում հղում է կատարվում 2020 թվականի նոյեմբերի 25-ին Սենատի կողմից ընդունված Լեռնային Ղարաբաղի Հանրապետությունը ճանաչելու անհրաժեշտության մասին բանաձևին: Շեշտվում է Ադրբեջանի ագրեսիայի շարունակականությունը. օգոստոսի սկզբին՝ Լաչինի/Բերձորի ուղղությամբ և սեպտեմբերի 13-14-ին՝ ՀՀ ինքնիշխան տարածքների նկատմամբ՝ կոչ անելով Ադրբեջանին դուրս բերել զորքերն այդ տարածքներից: Բանաձևում Ֆրանսիայի օրենսդիրը կոչ է անում անհապաղ և անվերապահ ազատ արձակել և հայրենադարձել բոլոր հայ ռազմագերիներին, ինչը ևս Ադրբեջանի կողմից պայմանավորվածությունները և միջազգային պարտավորությունները չկատարելու հետևանք է: Բանաձևն ուղղված է նաև Ադրբեջանի իշխանություններին և տարածաշրջանում նրանց բոլոր գործընկերներին, մասնավորապես՝ Թուրքիային»,- Aravot.am-ի հետ զրույցում իր տեսակետը ներկայացրեց Նելլի Բաղդասարյանը:
Ըստ մեր զրուցակցի, հասկանալի է, որ այս փուլում խնդիրը կարող է հակակշռվել ֆրանսիական օրենսդիր-գործադիր դաշտում, բայց բանաձևը հնարավորություն ունի շղթայական ազդեցություն ունենալու միջազգային հանրության շրջանում. «Այն հստակ վերաբերմունք է ժողովրդավարական արժեքների, ինքնորոշման իրավունքի, պետության ինքնիշխանության դեմ ոտնձգությունների նկատմամբ: Սենատի բանաձևը կոչ է՝ պատասխանատվության և պատժամիջոցների մեխանիզմներ ամրագրելու Ադրբեջանի նկատմամբ»:
Կարդացեք նաև
Նելլի ԳՐԻԳՈՐՅԱՆ
