Լեհաստանի իշխանությունները գիշերը պաշտոնապես հաստատել են ավելի վաղ լրատվամիջոցներում տարածված տեղեկությունը, որ լեհ-ուկրաինական սահմանին հրթիռ է ընկել, ինչի հետևանքով երկու քաղաքացիական անձ է զոհվել:
«15:40-ին Պշևոդուվ գյուղում… ընկել է ռուսական արտադրության հրթիռ, ինչի հետևանքով զովել է Լեհաստանի Հանրապետության երկու քաղաքացի: Այդ կապակցությամբ արտգործնախարար Զբիգնև Ռաուն ԱԳՆ է կանչել ՌԴ դեսպանին և պահանջել անհապաղ մանրամասն բացատրություն տալ»,- ասվում է Լեհաստանի ԱԳՆ հայտարարության մեջ:
Լեհաստանի վարչապետ Մատեուշ Մորավեցկին հայտարարել է, որ իրենք ուժեղացնում են վերահսկողությունն օդային սահմանի վրա և դիտարկում են ՆԱՏՕ-ին դիմելու հնարավորությունը: Նա կոչ է արել միջազգային փորձագետների ուշադրությունը՝ պարզելու կատարվածի բոլոր հանգամանքները:
«Ուսումնասիրում ենք ՆԱՏՕ-ի կանոնադրության 4-րդ հոդվածը գործի դնելու պայմանները: Մշտական կապի մեջ ենք գտնվում Ուկրաինայի նախագահ Զելենսկու և դաշնակիցների հետ, որոնք վերահաստատում են իրենց աջակցությունը»:
Կարդացեք նաև
ՆԱՏՕ-ի կանոնադրության 4-րդ հոդվածը նախատեսում է, որ դաշինքի յուրաքանչյուր երկիր կարող է նախաձեռնել խորհրդակցություններ մյուս դաշնակիցների հետ՝ ցանկացած երկրի կողմից իր տարածքային ամբողջականության, քաղաքական անկախության և անվտանգության նկատմամբ վտանգի դեպքում:
Մորավեցկին նաև հայտնել է, որ Լեհաստան կհրավիրվեն միջազգային փորձագետներ՝ կատարվածի հանգամանքները պարզելու համար:
Ավելի ուշ Լեհաստանի նախագահ Անջեյ Դուդան հայտարարել է, որ առայժմ չկան նշաններ, որ նման միջադեպ կարող է կրկնվել:
«Մենք այս պահին չունենք սպառիչ ապացույցներ այն մասին, թե ով է արձակել հրթիռը,- ասել է Դուդան,- քննությունը դեռ շարունակվում է:
Լեհաստանում տեղի ունեցածի առնչությամբ տեղի է ունեցել G7-ի երկրների առաջնորդների արտահերթ հանդիպում:
«Չեմ ուզում որևէ բան ասել, մինչև որ լիարժեք քննություն անցկացնենք, բայց դատելով ուղեգծից՝ քիչ հավանական է, որ այն արձակվել է Ռուսաստանից, բայց կտեսնենք»,- ասել է Բայդենը:
Նա նաև ասել է, որ համաշխարհային առաջնորդները կորոշեն իրենց հետագա քայլերն այն բանից հետո, երբ որ հստակ պարզվի՝ ինչ է տեղի ունեցել:
Ավելի ուշ CNN-ը, հղում կատարելով ՆԱՏՕ-ի անանուն աղբյուրին, հայտնել է, որ դաշինքի հետախուզական ինքնաթիռը, որն իր առաքելությունն էր կատարում Լեհաստանի օդային տարածքում, արձանագրել է հրթիռի թռիչքը:
Հեռուստաալիքի աղբյուրը չի նշել՝ ում կողմից է արձակվել այդ հրթիռը: Նա նաև չի ասել, թե կոնկրետ որտեղից է այն արձակվել: Նրա խոսքով՝ հավաքված հետախուզական տվյալները, այդ թվում հրթիռի ուղեգիծը, փոխանցվել են ՆԱՏՕ-ին և Լեհաստանին:
Պատրաստեց Վիկտորյա ԱՆԴՐԵԱՍՅԱՆԸ
Աղբյուրներ՝ Reuters, BBC, CNN
