Այսօր ԱԺ հայտարարությունների ժամին «Հայաստան» խմբակցության պատգամավոր Գեղամ Նազարյանը հիշեցրեց իշխանականների կարգախոսները՝ «Արցախը տանք, լավ ենք ապրելու». «Հիմա հարց՝ իսկ ո՞ւր է խաղաղությունը, ինչո՞ւ լավ չենք ապրում, ինչի՞ լավ չի ապրում մի քիչ վիճակագրական քաղաքացին, որը կռացել է վարկերի տակ, ամեն օր փորձում է հրաշքներ գործել՝ երեխաներին կերակրելու, ուսման տալու համար: Ո՞ւր է անհոգ կյանքը: Այս ու այն պաշտոնյաներ, այդուհանդերձ, կրկնում են, որ Արցախը տանք, լավ ենք ապրելու: Ոմանք նաեւ ասում են՝ խի Արցախը մե՞րն է եղել, որ հիմա էլ տանք»:
Նա ասաց, որ 2020-ի նոյեմբերի 9-ից հետո շատ կոպիտ սխալ են թույլ տվել՝ ասելով, որ կողմ են արժանապատիվ խաղաղությանը, բայց այլ կերպ խաղաղություն չի էլ լինում, ծնկի եկածին խաղաղություն չեն տալիս. «Եթե կրակում են Ջերմուկի վրա, այնքան էլ կրակում են Հյուսիսային պողոտայում զբոսնողների վրա: Չի կարող վատ լինել Ջերմուկում, իսկ Երեւանում կամ Վանաձորում՝ վատ»:
Նազարյանը հայտարարեց, որ Արցախից չենք ազատվելու, որովհետեւ Արցախը մեր բաղկացուցիչ մասն է, Սյունիքը չենք հանձնելու, ճանապարհներ չենք տալու ու ապրելու ենք խաղաղ. «Հետպատերազմյան առաջին օրենքն է՝ երկիրը պարտության տարած իշխանությունը չպետք է ղեկավարի երկիրը»:
ԱԺ նախագահ Ալեն Սիմոնյանն արձագանքեց. «Դա արդեն ՀՀ ժողովուրդն է որոշում, պարո՛ն Նազարյան»:
Կարդացեք նաև
Հռիփսիմե ՋԵԲԵՋՅԱՆ
