ՀՀ ԿԳՄՍ նախարարության աջակցությամբ Կամերային երաժշտության ազգային կենտրոնի «Հայահավաք» նախագծի շրջանակում «Տաղարան» հնագույն երաժշտության համույթը (գեղարվեստական ղեկավար և դիրիժոր՝ ՀՀ մշակույթի վաստակավոր գործիչ Սեդրակ Երկանյան) եւ «Քլինգեն երգչախումբ և մշակութային ասոցիացիան» (Միացյալ Թագավորություն, գեղարվեստական ղեկավար և դիրիժոր՝ Սիփան Օլահ) իրականացրին «Մոնտեվերդիից Սարյան» համերգային ծրագիրը:
Կոմիտասի անվան կամերային երաժշտության տանը կայացած համերգի ընթացքում ելույթ ունեցան Միացյալ Թագավորությունից ժամանած երաժիշտներ՝ տենոր եւ դիրիժոր Սիփան Օլահը, հոբոյահար Հակոբ Ջեք Մուրատյանը եւ Մարիա Փալազեանը (կլավիսին, դաշնամուր): Համերգի ընթացքում հնչեցին Ջիորդանիի, Կալդարայի, Սկարլատիի, Մոնտեվերդիի, Գլյուկի, Հենդելի, Մարչելոյի, Կարիսիմիի, Բոնոնչինիի, Սպենդիարյանի, Ղազարոս Սարյանի ու Ալեքսանդր Հարությունյանի ստեղծագործությունները: Նշենք, որ գործիքային անսամբլի բոլոր մշակումները Սիփան Օլահինն էին: Բոլոր կատարումներից հետո հնչում էին բրավոներ, եւ հանդիսատեսը ջերմ էր արձագանքում ելույթներին։
Կարդացեք նաև
«Չափազանց ոգեւորված եւ զգացմունքային պահ է, չափազանց սպասված համերգ էր ինձ համար, Հակոբը եւ Մարիան առաջին անգամ են հայրենիքում: Շատ շնորհակալ ենք ձեր ջերմ էներգիայի ու ներկայության համար: Հույս ունենանք, որ հետագայում եւս կլինեն այստեղ կրկին հանդես գալու նմանատիպ առիթներ, ինչպես նաեւ հայ երգարվեստը ինչպես շարունակում ենք վառ պահել Միացյալ Թագավորությունում, այնպես կշարունակենք վառ պահել աշխարհասփյուռ հայ գաղթօջախներում»,-ասաց Սիփան Օլահը: Կամերային երաժշտության ազգային կենտրոնի կողմից Սիփան Օլահը պարգեւատրվեց շնորհակալագրով:
Հավելենք, որ Կամերային երաժշտության ազգային կենտրոնի «Հայահավաք» նախագծի շրջանակում արդեն Հայաստանում ելույթներով հանդես են գալիս հայազգի արտիստներ, որոնք նախկինում ինչ-ինչ պատճառներով դեռեւս ելույթներ չեն ունեցել կամ ակտիվ ստեղծագործական գործունեություն չեն ծավալել հայրենիքում։ Նախագծի շրջանակում ավելի վաղ Երևանում համերգներով ներկայացել են դիրիժորներ Միսաք Պաղպուտարյանը (Սիրիա), Նուրհան Արմանը (Կանադա), Լյուք Բաղդասարյանը (Շվեյցարիա), Կարո Ավեսյանը (Լիբանան) և Պետրոս Շեթիլյանը (ԱՄՆ)։
Գոհար ՀԱԿՈԲՅԱՆ
