Վաղը վճռորոշ օր է Շիրակի մարզի Անի խոշորացված համայնքի համար․ տեղի է ունենալու նորընտիր ավագանու անդրանիկ նիստը, որի ընթացքում ընտրվելու է համայնքապետ։
3 մանդատ ստացած «Հայկական երազանք» կուսակցությունը, որից էլ կախված է համայնքապետի ընտրությունը, վաղը չի մասնակցի նիստին։ Այս մասին Aravot.am-ին տեղեկացրեց կուսակցության առաջնորդ Ագուն Սաղաթելյանը։
Անիում, ինչպես բազմիցս գրել ենք, անելանելի իրավիճակ է ստեղծվել․ ՏԻՄ ընտրություններին մասնակցել են երեք քաղաքական ուժեր․ «Ազգ-համայնք» դաշինքը, որը գլխավորում է 18 տարվա ՀՀԿ-ական համայնքապետ Արտակ Գևորգյանը, ստացել է 10 մանդատ, ՔՊ-ն, որը գլխավորում է «Հայ Փոստի» տեղի պատասխանատու Արման Սարիբեկյանը՝ 8 մանդատ։
Այս երկու ուժերն էլ ակամա կախյալ վիճակում են հայտնվել երեք մանդատ ստացած «Հայկական երազանք» կուսակցությունից, քանի որ միանձնյա չեն կարողանա ձևավորել իշխանություն, չեն հավաքել ձայների կեսից ավելին, չեն էլ պատրաստվում միմյանց հետ կոալիցիա կազմելու։
Կարդացեք նաև
ՔՊ-ի թեկնածուն մեզ հետ զրույցում բացառել էր իշխանության ձևավորվումն Արտակ Գևորգյանի գլխավորած «Ազգ-համայնք» դաշինքի հետ, քանի որ, ըստ նրա, իրենք եկել են ներկաների թողած երևույթները մաքրելու։
Ագուն Սաղաթելյանն էլ իր հերթին հայտարարել է, որ իր գլխավորած քաղաքական ուժը որևէ մեկին չի միանալու, եթե որևէ մեկը ցանկություն ունի իրեն միանալու, թիմով կքննարկեն այդ հարցը։ Սա նշանակում է՝ որ ուժն էլ միանա իրենց, համայնքապետ առաջադրելու է Ագուն Սաղաթելյանին։
Մեր տեղեկություններով, այս ընթացքում թե՛ ՔՊ-ական վերնախավը, թե՛ ՀՀԿ-ական Արտակ Գևորգյանն ու նրա թիմակիցները շատ են փորձել բանակցել «Հայկական երազանք» կուսակցության ցուցակը գլխավորող Ագուն Սաղաթելյանի հետ, որպեսզի վերջինս մտափոխվի, հրաժարվի իր դրած խիստ պայմանից ու միանա իրենց, սակայն վերջինս անդրդվելի է։ Նույնիսկ վաղվա նիստին չի մասնակցելու։ Իսկ սա նշանակում է Անիում իշխանության ղեկը ո՛չ ՔՊ-ն, ո՛չ էլ ՀՀԿ-ական Արտակ Գևորգյանն են ստանձնելու։
Եվ եթե վաղը ՔՊ-ն ու «Ազգ-համայնք» դաշինքը իշխանություն չձևավորեն, որը, ինչպես գրել ենք՝ անհավանական է, ապա իշխանության ձևավորման համար ընդամենը երկշաբաթյա ժամկետ է մնում։ Վաղը կկասեցվեն գործող համայնքապետ Արտակ Գևորգյանի լիազորությունները, պարտականությունները կդրվեն նրա տեղակալի վրա։
Իսկ եթե երկշաբաթյա ժամկետում՝ քվորում չապահովվի ու ավագանին վերջնականապես լուծարվի, վերջնաժամկետը նոյեմբերի 25-ին է, ըստ ՏԻՄ օրենքի, վարչապետի հրամանով կնշանակվի համայնքապետի ժամանակավոր պաշտոնակատար, այնուհետ նոր ընտրություններ կհայտարարվեն։
Նունե ԱՐԵՎՇՏԱՅԱՆ
