Կսահմանափակվի գենետիկորեն ձեւափոխված օրգանիզմների կիրառումը ՀՀ ամբողջ տարածքում

Նախագծով կանոնակարգվում են գենետիկորեն ձեւափոխված օրգանիզմների կիրառման սահմանափակումների եւ այդ հարցերի հետ  կապված իրավահարաբերությունները: Նախագծի ընդունման դեպքում գենետիկորեն ձեւափոխված օրգանիզմների ներմուծման, տեղափոխման, փոխադրման արգելքների սահմանումը կհանգեցնի երկրի կենսաբանական անվտանգության եւ բնակչության առողջության պահպանման մակարդակի բարձրացմանը եւ դրանց կիրառման հետ կապված իրավահարաբերությունների կանոնակարգմանը: Օրենքի նախագծով առավելագույնս կսահմանափակվի գենետիկորեն ձեւափոխված օրգանիզմների կիրառումը Հայաստանի Հանրապետության ամբողջ տարածքում. ասել է Էկոնոմիկայի փոխնախարար Արման Խոջոյանը «Գենետիկորեն ձեւափոխված օրգանիզմների մասին» եւ կից ներկայացված օրենքների նախագծերի փաթեթի քննարկման ժամանակ:

ԱԺ տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության հարցերի մշտական հանձնաժողովը նախագիծը քննարկել է նոյեմբերի 9-ի նիստում:

Օրենսդրական փաթեթի ընդունման նպատակն է ՀՀ-ում ԳՁՕ-ների գործածության եւ կենսաանվտանգության հետ կապված հարաբերությունների կանոնակարգման միջոցով  բացառել դրանց հնարավոր անբարենպաստ ազդեցությունը շրջակա միջավայրի, մարդու առողջության, կենսաբազմազանության, գյուղատնտեսական նշանակության հողերի անվտանգության վրա:

Փոխնախարարի խոսքով նախագիծը վերաբերում է միայն սերմերի եւ տնկանյութերի ներմուծման սահմանափակմանը, որը վերաբերում է գենետիկորեն ձեւափոխված օրգանիզմներին: Արման Խոջոյանը նշել է, որ այն չի վերաբերում սննդամթերքում առկա գենետիկորեն ձեւափոխված օրգանիզմներին, որը կանոնակարգվում է այլ օրենքով:

ԱԺ տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության հարցերի մշտական հանձնաժողովի նախագահ Վահե Ղալումյանի այն հարցին, թե որ կառույցն է ստանձնելու օրենքի վերահսկման գործառույթը, նշվել է, որ վերահսկողությունն իրականացնելու է Սննդամթերքի անվտանգության տեսչությունը:

Նախագիծը հանձնաժողովի կողմից ստացել է դրական եզրակացություն:

««Ավտոտրանսպորտային միջոցների կայանատեղերի տեղական վճարի եւ վարչական վարույթի առանձնահատկությունների մասին» օրենքում փոփոխություն կատարելու մասին» օրենքի նախագծի քննարկումը հիմական զեկուցողի բացկայության պատճառով հետաձգվել է:

ՀՀ Ազգային ժողով