RESTORE կլինիկական հետազոտության շրջանակներում աշխարհում առաջին անգամ մարդուն արհեստական արյուն է ներարկվել․ հայտնում է Քեմբրիջի համալսարանի լրատվական գործակալությունը։
Հետազոտության հեղինակները արյան նմուշներ են վերցրել Մեծ Բրիտանիայի ազգային առողջապահական ծառայության դոնորների բազայից՝ դրանցից լաբորատոր եղանակով ստանալով արհեստական էրիթրոցիտներ, որոնք փոխներարկվել են կամավորներին։ Ի տարբերություն սովորական էրիթրոցիտների, աճեցված բոլոր բջիջները երիտասարդ են (դոնորական արյունը տարբեր տարիքի բջիջներ է պարունակում)։
Սեդրիկ Գիվերտ
«Հույս ունենք, որ լաբորատորիայում ստեղծված էրիթրոցիտները ավելի երկար կապրեն, քան սովորական բջիջները։ Եթե մեր փորձարկումը հաջողությամբ պսակվի, ապա պարբերաբար արյան փոխներարկման կարիք ունեցող պացիենտներն ապագայում ավելի քիչ կենթարկվեն այդ միջամտություններին։ Դա կարող է փոխել նրանց բուժման ընթացքը»,- ասում է հետազոտության հեղինակ, արյունաբան Սեդրիկ Գիվերտը։
Արհեստական եղանակով ստացված էրիթրոցիտները կարող են փոխներարկվել սակավարյունություն, ինչպիսին, օրինակ, մանգաղաձև բջջային անեմիան է և այլ հիվանդություններ, արյան հազվադեպ խումբ ունեցող մարդկանց։
Կարդացեք նաև
Հետազոտության մեկ այլ հեղինակ՝ դոկտոր Ռեբեկա Կարդիգանն ասում է․ «Իսկապես ֆանտաստիկ է, որ մենք կարողացանք բավականաչափ էրիթրոցիտներ ստանալ՝ այս փորձարկումն անցկացնելու համար։ Մենք անհամբերությամբ սպասում ենք հետազոտության արդյունքներին՝ հասկանալու համար՝ դրանք ավելի լավ կաշխատե՞ն արդյոք, քան սովորական էրիթրոցիտները»։
Բրիստոլի համալսարանի բջջային կենսաբանության պրոֆեսոր Էշլի Թոյի խոսքով․ «Սա հսկայական քայլ է, և մենք ուրախ ենք տեսնել, թե ինչ լավ են աշխատում բջիջները կլինիկական փորձարկման ավարտին»։
Այս պահին գիտնականներն ուսումնասիրում են արհեստականորեն ստեղծված բջիջների կյանքի տևողությունը։ Հետազոտողները հույս ունեն, որ այդ բջիջներն իրենց ավելի լավ կդրսևորեն, քան դոնորներից վերցված ստանդարտ էրիթրոցիտները։
Պատրաստեց Մարինե ԱԼԵՔՍԱՆՅԱՆԸ
