«Մինչև 2018-ը ՀՀ կառավարությունը, ինչպես նաև Արցախի կառավարությունը, օգտագործելով թրաֆիքինգի գործիք հանդիսացող Քաշաթաղի շրջվարչակազմը, ՀՀ-ում և Արցախում զբաղվել են թրաֆիքինգով»,- ՀՀ ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանի նախաձեռնած ԱՀ Քաշաթաղի շրջանից տեղահանված բնակիչների բնակարանային ապահովման, տեղահանման հետևանքով կրած նյութական վնասների փոխհատուցման վերաբերյալ քննարկման ժամանակ հայտարարեց «Վերադարձ դեպի Քաշաթաղ» ՀԿ ներկայացուցիչ Վրեժ Հարությունյանը (լուսանկարում):
Նա վստահեցրեց՝ իրենց պայքարն իրավական դաշտում է. «Մենք չենք եկել այստեղ ասելու՝ երեք կիլոգրամ մակարոնի փոխարեն տասը կիլոգրամ տվեք: Մերն իրավական պահանջ է: Առողջ մտքով քաշաթաղցիները երբեք Հանրապետության հրապարակում՝ կառավարության շենքի դիմաց չեն եղել»:
Վրեժ Հարությունյանը նշեց, որ 18.000 քաշաթաղցիներ ունեն բնակարանային և այլ խնդիրներ: Ու հայտնեց՝ բնակարանի տրամադրման վկայականները քաշաթաղցիները «սև թուղթ» են կոչում և պարզաբանեց. «Այդ վկայականով առաջարկվում է մինչև տասը միլիոն դրամ: Ո՞վ կարող է այսօր այդ գումարով բնակարան գնել կամ կառուցել: Իբր թե մի մեծ բան են արել, սոցապնախարարությունը քաշաթաղցիներին առաջարկում է տեղափոխվել սահմանամերձ գոտիներ: Ի՞նչ է նշանակում՝ ծակ գրպանով քաշաթաղցու միջոցով սահման ե՞ք պահելու, թե՞ թնդանոթի միս եք ավելացնում: Ենթադրենք մի հյուղակ գնել է քաշաթաղցին, ի՞նչ է անելու. ոչ գույք ունենք, ոչ մի գործ ձեռնարկելու միջոց: Այնտեղ ուղարկեք գործարարներին, օլիգարխներին»:
Քաշաթաղցիները նաև մտահոգված են, որ իրենց տրամադրվել են 070 կոդով ճամփորդական անձնագրեր. «Մենք արցախցի չենք համարվում, բայց մեզ այդ կոդով անձնագրեր են տրամադրվել, և ՀՀ-ում այդ անձնագրով մարդիկ համարվում են օտարերկրացիներ: Սա գժվելու բան է՝ ո՞նց կարող ենք օտար լինել մեր հայրենի հողում»:
Կարդացեք նաև
Պարոն Հարությունյանն ասաց՝ իրենք պահանջում են շուկայից տեղեկանալ, գները ճշտել, որ քաշաթաղցին գոնե վկայականով կարողանա միջին որակի տուն գնել:
Քաշաթաղցիներն ասացին, որ իրենցից շատերը չունեն անգամ սեփականության վկայականներ: Տեղահանված Մարիամ Հայրապետյանն ասաց. «Երբ մենք ի սկզբանե գնացել ենք Քաշաթաղ, պայման կար, որ բնակվում ենք տասը տարի, հետո ունենում ենք սեփականաշնորհման վկայական: Կային մարդիկ, որոնք արդեն ստացել էին, իսկ կոնկրետ իմ տասը տարին լրանում էր 2020-ի սեպտեմբերին, բայց պատերազմը խանգարեց»:
Նա նաև մտահոգություն հայտնեց, որ փոխհատուցում ստանում են այն քաշաթաղցիները, որոնք մեծ այգիներ ունեին, գյուղտեխնիկա, անասուններ: Բայց իրենք այդ խմբերում չեն, մինչդեռ նշեց, որ, օրինակ՝ իր տնամերձը 0.6 հա էր:
Տաթև ՀԱՐՈՒԹՅՈՒՆՅԱՆ
