«Կարծում եմ այնպես չէ, որ պարոն Սուքիասյանի պահվածքը իմիտացիա էր, հասարակության ուշադրությունը շեղելու փորձ։ Նա իսկապես գերնյարդայնացած էր։ Ես զարմացած եմ նրա պահվածքից։ Նրան վաղուց եմ ճանաչում, ինքը խորհրդարանում աշխատում էր միշտ զուսպ լինել իր արտահայտություններում», -«Հայելի» ակումբում նշեց լեզվաբան Նարինե Դիլբարյանը՝ անդրադառնալով խորհրդարանում լրագրողների հետ շփման ժամանակ Խաչատուր Սուքիասյանի պահվածքին: Գործարար պատգամավորին հունից հանել էր լրագրողի հարցը, որը վերաբերում էր «Ապօրինի գույքի բռնագանձման մասին» օրենքը կիրառելու գործողություններին ու մասնավորապես «Սիլ պլազա» շենքի պատմությանը:
Նարինե Դիլբարյանի խոսքով, Սուքիասյանը նյարդայնացավ, թե ինքը մի պատ է գնել , մինչդեռ խնդիրը այդ պատը չէր, այլ Երեւանի կենտրոնում գտնվող տարածքը, եւ որ ամենակարեւորն է՝ լեզվաբանի կարծիքով, իրականության բացահայտման փորձը գործարարի համար իսկապես անակնկալ էր։
Նա փաստում է, որ իշխանությունը, մասնավորապես ՔՊ-ական ու ՔՊ-ամերձ իշխանությունը միասեռ զանգված չէ, եւ նրա ներսում էլ կա ընդդիմություն, ինչի արտահայտությունն է նաեւ Սուքիասյանի եւ նախարար Քերոբյանի առճակատումը․ «Բավականին զավեշտալի համբավ ունեցող էկոնոմիկայի նախարարի ներկայացրած պատկերն իրոք ծիծաղելի էր, իսկ Սուքիասյանը լինելով մի մարդ, որ իրապես լավ է հասկանում տնտեսությունից, նշեց, որ ոչինչ չեք արել Ռուսաստան-Ուկրաինա պատերազմից հետո, երբ Հայաստան են գալիս մարդիկ՝ մեծ գումարներով ու գործունեություն են ծավալում»։ Գործարար պատգամավորը նաեւ ասել էր, որ իրեն հաճելի չէ նման կարգի էկոնոմիկայի նախարարի հետ զրույց ունենալը, որը ոչ մի թիվ ու ծավալ չի նշում։
Դիլբարյանը վստահ է, որ ՔՊ-ական թիմում յուրաքանչյուրի վրա ունեն ինչ-որ փաթեթ գործեր հարուցելու, հանրային դժգոհություն բարձրացնելու համար։
Կարդացեք նաև
Մյուս կողմից էլ նկատեց, որ կոռուպցիայի դեմ պայքար որակվող «զենքն» արդեն վաղուց իրեն սպառել է։ Նրա խոսքով, ապրում ենք միֆերի փլուզման ժամանակաշրջանում, ինչը պահանջում է հասարակության քաղաքական, գիտական եւ մտավոր ներուժի համախմբում․ «Հեղափոխությունը կատարվեց մի քանի ցնցիչ ձեւավորված միֆերով, որը նաեւ ազդեց Արեւմուտքի վրա։ Օրինակ, առաջին միֆն այն էր, թե իբր Հայաստանը ժողովրդավարության միջնաբերդն է, եւ իրենք պայքարում են կոռուպցիայի դեմ։ Ընդ որում, կոռուպցիա բառը դարձրել էին Աստված բառին հոմանիշ, իսկ հաջորդ զարհուրելի միֆն այն էր, որ իրենք բերում են ժողովրդավար ընտրություններ»։
Գոհար ՀԱԿՈԲՅԱՆ
