«Արփի լիճ ազգային պարկի» տնօրեն Մուշեղ Մուրադյանն Aravot.am-ի հետ զրույցում ասաց, որ սև արագիլների թիվը հասել է 14-ի, դրանք հիմնականում «Արփի լիճ ազգային պարկի» Ախուրյանի կիրճի հատվածում են։
Մեր զրուցակիցը նաև հավաստիացրեց, որ եվրոպական մի քանի երկրներից՝ Ֆրանսիայից, Գերմանիայից և Իտալիայից զբոսաշրջիկները հատուկ գալիս են Ախուրյանի կիրճ՝ սև արագիլներին տեսնելու համար։ Նրանք «Արփի լիճ ազգային պարկի» տարածքից հեռանում են ՝ վերստին վերադառնալու ցանկությամբ։
Կարդացեք նաև
«Մեր մոնիթորինգի արդյունքում հաշվառվել են 14 սև արագիլներ, կարելի է ասել՝ այս քանակը եռապատկված է։ Զբոսաշրջիկներին ձգում է սև արագիլներին տեսնելու ցանկությունը, արտերկրից գալիս են հատուկ սև արագիլներին տեսնելու։
Զրուցում ենք նրանց հետո, ասում են՝ տեղեկացել ենք պարկի տարածքում կան սև արագիլներ,եկել ենք, եթե հնարավորություն լինի, եղանակային պայմանները թույլ տան թռչնադիտարկում իրականացնենք, մեծ ցանկություն ունենք սև արագիլներին տեսնելու։ Պահեր են լինում, որ, բարեբախտաբար, տեսնում են, ֆիքսում են, նկարում են։
Այնպիսի տպավորություն ենք ստանում, որ կարծես զբոսաշրջիկի մոտ նպատակի իրականացում է եղել», -ասաց Մուշեղ Մուրադյանը։
Մեր զրուցակցի փաստմամբ, ամառային զբոսաշրջության շրջանն ավարտվեց, պատրաստվում են ձմեռային զբոսաշրջությանը, այն ևս ակտիվ է այս տարածքում։
Մուշեղ Մուրադյանն ասաց․ «2022 թվականը զբոսաշրջության առումով «Արփի լիճ ազգային պարկի» տարածքում բում էր․ 7200 զբոսաշրջիկ են այցելել, նրանից 1000-ից ավելին օտարերկրյա քաղաքացիներ են»։
Ըստ Մուշեղ Մուրադյանի, ձմռանը « Արփի լիճ ազգային պարկը» էքստրեմալ զբոսաշրջության սիրահարներին և սիրողական ձկնորսներին է գրավում։
«Այնպիսի օրեր են լինում, երբ լճի սառույցի հաստությունը 60 սանտիմետրից հասնում է շուրջ մեկ մետրի, լճի վրա 40-50 վրաններ են հայտնվում։ Այսինքն՝ սիրողական ձկնորսները սառույցի շերտը ձկնորսական համապատասխան սարքավորումներով ծակելուց հետո զբաղվում են ձկնորսությամբ․ և փառք Աստծո այսօրվա մեր ունեցած ձկնապաշարի պայմաններում Արփի լճից ոչ ոք ձեռնունայն չի գնում»։
Նունե ԱՐԵՎՇԱՏՅԱՆ
