Այսօր էկոնոմիկայի նախարար Վահան Քերոբյանը 2023-ի բյուջեի նախագծի քննարկման ժամանակ ներկայացրեց գյուղատնտեսության ոլորտի հատկացումները: ԱԺ ֆինանսավարկային եւ բյուջետային հարցերի հանձնաժողովի նախագահ Գեւորգ Պապոյանը հարցրեց. «Պիտի փաստացի արձանագրենք, որ գյուղատնտեսությունը միակ ճյուղն է, որտեղ 9 ամսվա կտրվածքով չունենք աճ, ընդհակառակը՝ -0,7 անկում ունենք՝ չնայած կանխատեսել էինք, որ պետք է ունենայինք 4% ընդհանուր աճի մեջ նպաստում: Սա բացառություն է՝ բացասական իմաստով: Արդյունավետությունը բնորոշող որեւէ թիրախ չկա նախագծում ու դա թույլ չի տալիս արդյունավետ կառավարել ընթացքը, վերջնարդյունքում ունենում ենք բացասական մնացորդ»:
Քերոբյանը հակադարձեց. «Գյուղատնտեսությունը, մեր գնահատմամբ, Հայաստանում ոչ թե անկում է ապրել, այլ աճել է եւ դրա վերաբերյալ կան բազմաթիվ անուղղակի ապացույցներ, այդ թվում՝ գյուղմթերքի արտահանումը, որը այս տարի արդեն հասել է 2028-ի պլանին: Ներքին սպառման աճը նայեք եւ այլն, այսինքն, մենք անուղղակի չափանիշներով տեսնում ենք, ամեն ինչ խոսում է նրա մասին, որ գյուղատնտեսությունը կտրուկ աճել է, ոչ թե նվազել»:
Ըստ նախարարի, գյուղատնտեսության մեջ այսպես ասած կաղում է վիճակագրությունը. «Ինտենսիվ այգիները, խաղողագործությունը դրանք այնպիսի միջոցառում են, որ արդյունքը տալիս են 5-10 տարի հետո: Ու մինչեւ փաստացի արդյունքը չի ստացվում, մենք չենք կարողանում գնահատել: Օրինակ, ապահովագրությունը վերցնենք, եթե կհիշեք, 4-5 տարի առաջ ամեն կարկուտի հետեւից վազում էինք, հիմա քանի որ ապահովագրական համակարգը ներդրված է, կարելի է ասել, որ հիմա շատ քիչ ենք զբաղվում որեւէ բերքի փչացման հետ կապված հարցերով, որովհետեւ համակարգը դրած է: Գյուղացիներն իրենք պետք է հասկանան՝ գնո՞ւմ են իրենք այդ ռիսկին»:
Հռիփսիմե ՋԵԲԵՋՅԱՆ
