Ադրբեջանական լրատվամիջոցներում մեծ աղմուկ է բարձրացրել ռուսաստանցի գործարար Ռուբեն Վարդանյանի՝ Արցախի պետնախարար նշանակվելու լուրը, որոշ լրատվամիջոցներ անգամ բացահայտ սպառնալիքներ են հնչեցրել նրա հասցեին:
Այսպես, Caliber.az լրատվականը յություբյան էջում հրապարակել է տեսանյութ` «Օպերացիա «Պետնախարար». գտնել և ոչնչացնել» վերտառությամբ, որում հիշեցնում է, թե ինչպես են իսրայելական հատուկ ծառայությունները թիրախային ոչնչացնում ահաբեկիչներին:
Նշվում է, որ նույնը կարող են անել ադրբեջանական հատուկ ծառայությունները՝ ոչնչացնելով նրանց, «ովքեր սպառնում են Ադրբեջանի անվտանգությանն ու տարածքային ամբողջականությանը, հատկապես, որ նրանք գտնվում են Ադրբեջանի «սեփական տարածքում՝ Ղարաբաղում»: Ըստ այդմ, լրատվամիջոցը փաստում է, որ նշանակվելով պետնախարար՝ Վարդանյանն արդեն դարձել է «չեզոքացման թեկնածու»:
https://www.youtube.com/watch?v=h37ChpFOa8A&ab_channel=CaliberAz
Կարդացեք նաև
Մեկ այլ լրատվամիջոց, haqqin.az-ը, մեջբերելով Ռուբեն Վարդանյանի զրույցը «Կոմերսանտի» հետ, որում նա նշում է, թե իրենց համար ընդունելի չէ Սոչիի հայտարարությունը, և ինքը տեղափոխվել է «Արցախը փրկելու համար», գրել է.
«Այս կապակցությամբ տեղին է հիշեցնել, որ Ադրբեջանը «ղարաբաղյան հարցը» համարում է լիարժեք սպառված և չի պատրաստվում որևէ պետության հետ քննարկել իր շրջաններից մեկի (որը ժամանակավորապես գտնվում է ռուս խաղաղապահների հսկողության տակ) հետագա ճակատագիրը … Միաժամանակ, եթե ինչ-որ ռուս էմիսար Ադրբեջանի ինքնիշխան տարածքում պաշտոնապես իրեն դիրքավորում է որպես «Ղարաբաղի փրկության մարտիկ», Ադրբեջանը, այնուամենայնիվ, ստիպված կլինի վերադառնալ ղարաբաղյան հարցին: Ընդ որում, միայն նրա համար, որպեսզի վերջնականապես Խանքենդիում (Ստեփանակերտում․ «Առավոտ»)արմատախիլ անի անջատողականության արմատները և լիարժեք վերականգնի իր ինքնիշխանությունն իր տարածքների նկատմամբ»:
Ռուբեն Վարդանյանի՝ պետնախարար նշանակվելու կապակցությամբ արտահայտվել է նաև Միլի մեջլիսի պատգամավոր Այազ Գուլիևը՝ հայտարարելով, որ նրան տեղափոխել են «Ադրբեջանի տարածք, որտեղ ժամանակավոր տեղակայված են ռուս խաղաղապահներ, և նրա ձեռքով ցանկանում են խոչընդոտ ստեղծել հայ-ադրբեջանական խաղաղության օրակարգի համար»:
«Մի կողմից, դու խոսում ես խաղաղության մասին, մյուս կողմից քարոզչություն ես վարում Ադրբեջանի դեմ, տարածում ես սուտ ու զրպարտություն: Իհարկե, մենք հույս ունենք, որ առաջիկա ամիսներին այդ խաղաղության գործընթացն իր արդյունքները կտա և Հարավային Կովկասում կտիրի խաղաղություն և համաձայնություն»,- ասել է նա:
Պատրաստեց Վիկտորյա ԱՆԴՐԵԱՍՅԱՆԸ
