JAMnews. Հայ-ադրբեջանական հակամարտության կարգավորման հարցում Ռուսաստանի միջնորդությունը բավարար է: Նման տեսակետ է հայտնել Բելառուսի նախագահը, որն օրեր առաջ ասել էր, թե Ալիևը «մեր մարդն» է, և պետք չէ ՀԱՊԿ-ը հակադրել Ադրբեջանին:
Քաղաքագետ Գուրգեն Սիմոնյանն ասում է՝ Մինսկից հնչող ուղերձներն ամբողջությամբ Մոսկվայի դիրքորոշումը չեն արտահայտում, թեև ինչպես Բելառուսը, այնպես էլ Ռուսաստանը Հայաստանի նկատմամբ բարեկամական քաղաքականություն չեն վարում:
Փորձագիտական կարծիք
Քաղաքագետ Գուրգեն Սիմոնյանի խոսքով՝ Լուկաշենկոյի հայտարարությունները պետք է ընկալել որպես ոչ բարեկամական պետության ղեկավարի խոսքեր: Չի կարծում, թե դրանք ամբողջությամբ արտահայտում են Մոսկվայի դիրքորոշումը, թեև նկատում է՝ Ռուսաստանը նույնպես բարեկամական քաղաքականություն չի վարում:
Կարդացեք նաև
«Իմ կարծիքով՝ դա ընդամենը ազդակ է առ այն, որ ՀՀ–ն գտնվում է ոչ իր նմանների՝ բռնատիրական պետությունների ակումբում: Սա պետք է խթան լինի, որ վերանայենք նման ձևաչափի հարաբերությունները: Խոսքս ինչպես ՀԱՊԿ–ի, այնպես էլ հետխորհրդային տիրույթում ձևավորված ինտեգրացիոն մյուս կառույցների մասին է», – JAMnews-ի հետ զրույցում նշել է նա:
Սիմոնյանի դիտարկմամբ՝ նման հայտարարություններին պետք է կոշտ արձագանքել: Ըստ նրա՝ կարիք կա պատասխանել նաև Բելառուսի ԱԳՆ հաղորդագրությանը: Ոչ պրոֆեսիոնալ մոտեցում է որակում վարչապետի աշխատակազմի ղեկավարի մեկնաբանությունը, թե՝ բռնցքամարտ չէ:
Քաղաքագետի գնահատմամբ՝ Հայաստանի համար Բելառուսն ունեցել է զրոյական դերակատարում, նույնը չի կարելի ասել Ադրբեջանի մասին:
«Ադրբեջանին միանշանակ օգտակար է եղել, այդ թվում՝ սպառազինության ձեռքբերման տեսանկյունից: Նույն «Պոլոնեզ» տեսակի հրթիռների վաճառքը, ինչպես նաև անձնական, մտերիմ հարաբերությունները ցույց են տալիս, որ Մինսկը մեծապես օժանդակել է Բաքվին՝ Հայաստանի հետ նույն ռազմաքաղաքական դաշինքի մեջ լինելով», – շեշտել է նա:
Սիմոնյանը նկատում է՝ Բելառուսն ուզուրպացված է մեկ անձի կողմից, հետևաբար Լուկաշենկոյի քաղաքականությունը տարածվում է ողջ երկրի վրա:
Նրա խոսքով՝ եթե ապագայում ժողովրդին հաջողվի նրան ուղարկել պատմության լուսանցք և ստեղծել ժողովրդավարական պետություն, «Հայաստանը կքննարկի՝ քաղաքակրթական, քաղաքական, տնտեսական առումներով որքանո՞վ է շահավետ այդ պետության հետ երկկողմ հարաբերությունների զարգացումը»:
Նյութն ամբողջությամբ՝ սկզբնաղբյուր կայքում:
