«Ես այստեղ եմ իմ ընտանիքով, որովհետեւ օրակարգը Արցախի ինքնորոշման իրավունքն է: Ես ներկա եմ եղել Արցախի հանրահավաքին, պետք է տեսնեիք ինչ ոգի էր, այդ հզոր ոգին, մեր ժողովուրդը սպասումով է, որ ամբողջ աշխարհում հայությունը ոտքի կանգնի, ասի՝ Արցախի հարցը միայն արցախցունը չէ: Պետք է մտածենք, որ մեր անձնական շահի մասին, եթե մտածենք, որեւէ տեղ չենք հասնելու: Մեզ համար ավելի կարեւոր ազգային ու պետական շահն է, ինչն այսօր ոտնահարված է: Շատ խնդիրներ ունենք, ինչքան կարող ենք ամեն մեկս մեզ համար ապրենք: Եկեք ոտքի կանգնենք ու ասենք, որ Արցախի հարցը միայն արցախցունը չէ: Տեր կանգնենք մեր իրավունքներին»,- այսօր Ֆրանսիայի հրապարակում լրագրողների հետ զրույցում ասաց երգիչ Արսեն Գրիգորյանը՝ Մրոն:
Արսեն Գրիգորյանի խոսքով, խնդիրը գիտակցելու մեջ է, ու եթե կան մարդիկ, որոնք վախենում են ինչ-որ բան կորցնել պայքարի դիմաց, պետք է հասկանան, որ ավելի մեծ բան չկա, քան հայրենիք կորցնելը: Ըստ նրա՝ հայրենիքի մասին մտահոգվելը նույնն է, ինչ ծնողներիդ մասին ես մտահոգվում. «Ով որ համարում է, որ Արցախից ազատվելը բեռ է, որ պիտի ազատվես դրանից, ուրեմն նույնն է մտածում իր ծնողների մասին: Բացեք ձեր աչքերը»:
Երգչի խոսքով, այսօր ամեն ինչ պետք է անել նախ հզորանալու համար, այսօր պետք չէ խաղաղության պայմանագիրը. «Չգիտես՝ ինչ պայմանագիր է նաեւ, բայց այսօր՝ ոչ: Այսօր ամեն ինչ պետք է անենք ուժեղանալու համար: Այս ձեւով խաղաղություն չի կարող լինել, բանակցում են, հաջորդ օրը կրակում են, մտնում մեր տարածքը: Իրենք տրամադրված չեն խաղաղության»:
Արփինե ՍԻՄՈՆՅԱՆ
