20 տարվա պատմություն ունեցող Regnum գործակալության սեփականատերը որոշել է փոխել ԶԼՄ-ի տնօրենների խորհրդի կազմը եւ աշխատանքից ազատել է գլխավոր տնօրեն, հոգեբանական գիտությունների թեկնածու, սոցիոլոգ, բազմաթիվ գրքերի հեղինակ Յուլյա Կրիժանսկայային։ Նոր տնօրենն «անհայտ մարդ» է՝ RenTV-ից։ Այսպես է բնորոշել նրան Regnum-ի գլխավոր խմբագիր, քաղաքագետ Մոդեստ Կոլերովը՝ ասելով, որ նրա անունն ինքն անգամ չի կարողանում հիշել։
Regnum-ի կայքը բացել հնարավոր չէ՝ ընթերցողին սպասում է գործակալության գլխավոր խմբագիր, քաղաքագետ, պատմաբան Մոդեստ Կոլերովի ստորագրությամբ գրառում, որ Regnum-ը փակվում է, որ կառավարող ընկերության սեփականատերը, չբացատրելով պատճառներն ու նպատակը, փոխել է ընկերության ղեկավարությանը, որ տեղի է ունեցել լրատվամիջոցի ռեյդերական գրավում, եւ եթե այն աշխատի, ապա դա կլինի առանց իր մասնակցության ու կնշանակի, որ գրավումն ավարտված է։
Անշուշտ, Կոլերովը կատարված փոփոխությունը համարում է իր դեմ արված քայլ, եւ գլխավոր ինտրիգը հիմա այն է, թե կփոխվի՞ արդյոք գործակալության համեմատաբար ընդդիմադիր դիրքորոշումը։ Հասկանալի է, սակայն, որ «Ռեգնում»-ին չի կարելի լիարժեք ընդդիմադիր ԶԼՄ համարել, որովհետեւ Մոսկվայում ընդդիմադիր ԶԼՄ-ներ պարզապես չկան։ Պատահական չէ, որ իր վերջին գրառման մեջ Կոլերովը, որպես իր օգտին «պլյուս», նշում է Պուտինի բարձր գնահատականը, որը ՌԴ նախագահը հնչեցրել է «Ռեգնում»-ի 20-ամյակին։
Լրատվական եւ քաղաքագիտական շրջանակներում խոսում են, որ Մոդեստ Կոլերովին, որը մի քանի անգամ է «Ռեգնում»-ի գլխավոր խմբագիրը եղել, շուտով ազատելու են աշխատանքից, եւ «Ռեգնում»-ն իր հսկողության տակ է վերցնում գործարար, «Россия» բանկի հիմնական բաժնետեր ու նախկին նախագահ, Պուտինի ամենամոտ կողմնակից Յուրի Կովալչուկը, որը 70-ն անց մարդ է եւ քարոզչության ճակատում այնքան անձնուրաց է ծառայում Կրեմլին, որ, օրինակ, Ուկրաինայում նրան համարում են ապատեղեկատվական պատերազմների գեներալ։
Կարդացեք նաև
Ադրբեջանական կայքերը երեկվանից չեն թաքցնում իրենց ոգեւորությունը։ Անդրադառնալով «Ռեգնում»-ի փակմանը՝ նյութերի վերնագրերում նշում են, որ փակվում է պրոհայկական լրատվամիջոց, որը հայտնի էր հայերին պաշտպանող դիրքորոշմամբ։
Սյուզան ՍԻՄՈՆՅԱՆ
Հոդվածն ամբողջությամբ՝ «Հրապարակ» օրաթերթի այսօրվա համարում:
Այո Կոլերով կյանքը այդպիսի բաներ ունի, վարունգի նման’ ինչպես ասում էր Սերժ Սարգսյանը, մի օր ձեռքումդ է մի օր էլ ասված գիտի որտեղ։ Սրիկայություն քիչ էր պետք անել։
Ռուսաստանում տեռորի բոլոր նշանները կան երբ սեփական մանկլավիկներին են սկսում կուլ տալ….