«ԵՄ անդամ պետություններից մեկի հետ ՀՀ-ն խզել է դիվանագիտական հարաբերությունները, սակայն իմացանք, որ Հունգարիայի միջնորդությամբ վերադարձվեցին գերեվարված քաղաքացիներ։ Մամուլից տեղեկացանք, որ հարաբերությունների վերականգնման գործընթաց կա։ Ի՞նչ է տեղի ունենում»,-ԱԺ մշտական հանձնաժողովների համատեղ նիստում այսօր դիմելով ԱԳ փոխնախարար Պարույր Հովհաննիսյանին՝ հարցրեց ՔՊ խմբակցության պատգամավոր Սոնա Ղազարյանը։
Պարույր Հովհաննիսյանը պատասխանեց․ «Ոչ թե խզել էինք, այլ սառեցրել էինք, եւ գիտեք, թե ինչ դեպքերի արդյունքում դա եղավ։ Իսկապես, նախորդ տարի մենք տեսանք Հունգարիայի քայլը, որի արդյունքում հինգ գերիներ վերադարձվեցին ՀՀ։ Այլ քայլեր եւս տեսանք։ Գուրգեն Մարգարյանի անվան դպրոցին օգնություն տրամադրվեց։ Քովիդի դեմ պատվաստանյութ եւս տրամադրվեց ՀՀ-ին՝ որպես օգնություն։ Վերջերս Բուդապեշտում բացվեց հայկական կաթոլիկ եկեղեցին, պատրիարքը հանդիպեց Հունգարիայի նախագահի հետ։ Այսինքն, տեսնում ենք որոշակի քայլեր։ Ինչպես նախկինում ենք ասել, մենք պատրաստ ենք իրավիճակին լուծում տալ, բայց լրացուցիչ քայլեր են պետք։ Զգուշավոր լավատեսության տեղ կա»։
Հիշեցնենք, որ Գուրգեն Մարգարյանին կացնով սպանած Ռամիլ Սաֆարովին Ադրբեջանին արտահանձնելուց հետո ՀՀ-ն սառեցրել էր Հունգարիայի հետ դիվանագիտական հարաբերությունները։
Կարդացեք նաև
Լուիզա ՍՈՒՔԻԱՍՅԱՆ
