«2 նորություն կա, մեկը՝ լավ, մյուսը՝ վատ: Վատն այն է, որ բոլոր հարցերում, բոլոր ուղղություններում, որոնց շուրջ բանակցում ենք Ադրբեջանի հետ, հանդիպում ենք Ադրբեջանի առավելապաշտական դիրքորոշումներին: Իմ տպավորությունն այն է, որ Ադրբեջանը, համարելով, որ քանի որ ռազմական հաջողություն է ունեցել, այժմ կարող է պայմաններ թելադրել Հայաստանին: Սա իրականություն, իհարկե, չի կարող լինել եւ երկարատեւ, համապարփակ ու կայուն խաղաղության այս ճանապարհով հնարավոր չէ հասնել: Հույս ունեմ, որ Ադրբեջանում ժամանակի ընթացքում սա կհասկանան եւ եթե իսկապես շահագրգիռ են ունենալ կայուն խաղաղություն Հարավային Կովկասում, ապա պետք է որոշ հարցերում իրենք եւս արձանագրեն, որ միակողմանի շահավետ լուծումներ չեն կարող լինել, դա չի աշխատի երկարաժամկետ:
Լավ նորությունն այն է, որ բոլոր խնդիրները, որոնք կան մեր հարաբերությունների թնջուկում, ամբողջ փաթեթի նկատմամբ կա միջազգային հանրության հստակ ուշադրություն: Դա գնալով ավելի ու ավելի մեծանում է ու հատկապես սեպտեմբերի 13-14-ի ադրբեջանական ագրեսիայից հետո միջազգային հանրությունը հստակ ուղերձ հղեց Ադրբեջանին, որ ուժն ու ուժի սպառնալիքը չի կարող լինել ճանապարհ»,- այսօր ԱԺ-ում 2023-ի պետբյուջեի նախագծի քննարկման ժամանակ ասաց արտգործնախարար Արարատ Միրզոյանը: Նա նշեց, որ միջազգային հանրության ուղերձն այն է, որ կան կանոններ, որոնք չպետք է հատվեն:
Նա տեղեկացրեց, որ մի քանի օրից մեկնելու է Վաշինգտոն ու այնտեղ լինելու է իր, Բայրամովի եւ Բլինքենի հանդիպումը:
Կարդացեք նաև
Հռիփսիմե ՋԵԲԵՋՅԱՆ
