Կառավարության այսօրվա նիստում ներկայացվեց նախագիծ, որով նախատեսվում է 62 մլն դրամ, ինչպես նաև մոտ 140 մլն դրամ ուղղել կառավարության պահուստային ֆոնդ:
Մասնավորապես, նախատեսվում է Կապան խոշորացված համայնքի գյուղական բնակավայրերից ընտրված 10 բնակավայրերում իրականացնել կրթահամալիրների շենքային պայմանների բարելավում:
ՀՀ կառավարության նիստում ՀՀ ԿԳՄՍ նախարար Վահրամ Դումանյանը հայտնեց, որ Աճանան, Օխտար, Արծվանիկ, Գեղանուշ, Սյունիք, Եղեգ, Ծավ, Ճակատեն, Ներքին Հանդ, Շիկահող, Վերին Խոտանան, Դավիթ Բեկ և Եղվարդ գյուղերում կկառուցվեն նոր մոդուլային տիպի դպրոցներ։
«Այս բոլոր դպրոցները լինելու են ոչ միայն զուտ դպրոցներ, այլև համայնքային մշակութային կենտրոններ, որտեղ այլ միջոցառումներ ևս պետք է անցկացվեն: Այսպիսով` բոլոր 13 համայնքներում կկառուցվեն միայն մոդուլային կրթահամալիրներ»,– ասաց նախարարը։
Կարդացեք նաև
Ընդհանուր առմամբ Սյունիքի մարզում նախատեսվում է կառուցել 53 նոր կրթահամալիրներ, որոնք այս պահին գտնվում են նախագծային աշխատանքների փուլում։ Հայաստանում նախատեսվում է կառուցել ավելի քան 150 կրթահամալիր։
Համայնքների համար նախատեսված մոդուլային դպրոցները թույլ են տալու նույն շենքում ոչ միայն 12-ամյա կրթություն կազմակերպել, այլև ունենալու են կից մանկապարտեզներ։
ԿԳՄՍ նախարար Վահրամ Դումանյանը նշեց, որ նախկինում գործող բազմահամակազմ դասարանների նախատեսման սկզբունքը՝ երկու կամ երեք դասարանը մեկ դասարան դարձնելը, այլևս ընդունելի չէ:
«Նոր կրթահամալիրները պետք է նվազագույնը ունենան 12 դասարան, ինչպես նաև 1-ական դասասենյակներ զինվորական պատրաստության, կենսաբանության, քիմիայի, ֆիզիկայի, աշխարհագրության լաբորատորիաների համար»,-ասաց նախարարը:
Նախատեսվում է նաև գումարներ հատկացնել Արմավիրի մարզի Արգինեի միջնակարգ դպրոցին և Արարատի մարզի Դեղձուտի միջնակարգ դպրոցի կառուցման ավարտական աշխատանքների համար:
Լուսինե ՄԱՐԳԱՐՅԱՆ
