ԱՀ քննչական կոմիտեի քննիչի վարույթում քննվող քրեական գործով քննիչի ու ԱՀ ոստիկանության ծառայողների կողմից ձեռնարկված միջոցառումների արդյունքում բացահայտվել են միևնույն անձի կողմից կատարված հափշտակության դեպքեր:
Այսպես.
2022թ. հունիսի 17-ին Ստեփանակերտ քաղաքի բնակիչ Ա.Մ.-ն, շահադիտական դրդումներից ելնելով, ուրիշի գույքը գաղտնի հափշտակելու նպատակով, տան բաց պատուհանով ապօրինի մուտք է գործել Ստեփանակերտ քաղաքի Բեկզադյան փողոցի նրբանցք թիվ 3 հասցեում տեղակայված՝ քաղաքացի Ռ.Օ.-ին պատկանող առանձնատան ննջասենյակ և այնտեղից գաղտնի հափշտակել 195.000 ՀՀ դրամ կանխիկ գումար:
2022թ. հունիսի 25-ին, ժամը 20:00-ից 21:00-ն ընկած ժամանակահատվածում, Ա.Մ.-ն բաց պատուհանով ձեռքը մտցնելու եղանակով ապօրինի մուտք է գործել քաղաքացի Ն.Օ.-ի կողմից օգտագործվող «PORSCHE CAYENNE» մակնիշի 51 LM 500 պետական հաշվառման համարանիշի ավտոմեքենայի սրահ և այնտեղից գաղտնի հափշտակել 2.400 ՀՀ դրամ արժողությամբ դրամապանակը, դրա մեջ առկա մեկ զույգ 19.810 ՀՀ դրամ արժողությամբ ոսկյա ականջօղերը և 250.000 ՀՀ դրամ կանխիկ գումար:
Կարդացեք նաև
2022թ. հուլիսի 14-ին, ժամը 22:30-ի սահմաններում, նույն Ա.Մ.-ն, մոտեցել է Ստեփանակերտ քաղաքի Բեկզադյան փողոցի նրբանցք թիվ 3 հասցեում տեղակայված՝ Ռ. Օ.-ին պատկանող առանձնատան բաց պատուհանին և հափշտակություն կատարելու նպատակով փորձել ապօրինի մուտք գործել հիշյալ առանձնատուն, սակայն չկարողանալով մուտք գործել՝ այդպիսով չի կարողացել նաև ավարտին հասցնել իր հանցավոր մտադրությունը և դեպքի վայրից դիմել է փախուստի:
Քննիչի որոշմամբ Ա.Մ.-ն որպես մեղադրյալ է ներգրավվել ԱՀ քրեական օրենսգրքի 183-րդ հոդվածի 3-րդ մասի 2-րդ կետով (գողություն) և 33-183-րդ հոդվածի 3-րդ մասի 2-րդ կետով (գողության փորձ) նախատեսված ենթադրյալ հանցանքների կատարման համար, հսկող դատախազի կողմից քրեական գործը մեղադրական եզրակացությամբ ուղարկվել է դատարան:
Դատարանում մեղադրանքի պաշտպանությունն իրականացնելու է ԱՀ գլխավոր դատախազության սեփականության դեմ ուղղված հանցագործությունների գործերով բաժինը:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ԱՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
Արցախի Հանրապետության դատախազություն
