ՀՀ Ազգային ժողովի 2023 թ. բյուջետային հայտում կատարվել են նվազեցումներ: Այս մասին տեղեկացրել է ԱԺ աշխատակազմի ղեկավար-գլխավոր քարտուղար Վահան Նարիբեկյանը նոյեմբերի 2-ի ԱԺ պետական-իրավական հարցերի ու ֆինանսավարկային եւ բյուջետային հարցերի մշտական հանձնաժողովների համատեղ նիստում՝ ներկայացնելով գալիք տարվա գլխավոր ֆինանսական փաստաթղթով օրենսդիր մարմնի համար նախատեսված ֆինանսական հատկացումներն ու իրականացվելիք միջոցառումները:
Վահան Նարիբեկյանի խոսքով «ՀՀ Ազգային ժողովի լիազորությունների իրականացման ապահովում» ծրագրի ծախսային հայտը կազմել է 7,1 մլրդ դրամ, 2023 թ. պետական բյուջեի նախագծով ԱԺ-ին առաջարկվում է հատկացնել 6,9 մլրդ դրամ:
«ԱԺ գործունեության ապահովում, օրենսդրական, վերլուծական եւ ներկայացուցչական ծառայություններ» միջոցառման համար հայտով նախատեսվել է 5,9 մլրդ դրամ, նախագծով՝ 6,1 մլրդ: ԱԺ աշխատակազմի ղեկավար-գլխավոր քարտուղարի տեղեկացմամբ դրական տարբերությունը պայմանավորված է 2023 թ. հունվարի 1-ից նվազագույն աշխատավարձի բարձրացմամբ:
«Միջազգային խորհրդարանական կազմակերպություններին ՀՀ անդամակցության վճարներ» միջոցառմանն ուղղվող հատկացումները հայտով կկազմեն 167,2 մլն դրամ, իսկ նախագծով՝ 160,9 մլն դրամ: Տարբերությունը պայմանավորված է որոշ միջազգային խորհրդարանական կազմակերպությունների անդամակցության վճարների տարադրամի կուրսի փոխանակման տարբերությամբ:
Կարդացեք նաև
Ազգային ժողովի պետական ծառայողների վերապատրաստման համար նախատեսվում է հատկացնել 1,3 մլն դրամ, տեխնիկական հագեցվածության բարելավման համար՝ 127,4 մլն դրամ:
«Աջակցություն կուսակցություններին եւ կուսակցությունների դաշինքներին» ծախսային միջոցառման իրականացման համար նախատեսվել է 520,7 մլն դրամ: Ազգային ժողովի դերի բարձրացման համար ուղղված միջոցառումների իրականացման համար նախատեսվել է 65 մլն դրամ, ԱԺ շենքային պայմանների բարելավվման համար՝ 20 մլն դրամ, տրանսպորտային միջոցներով ապահովածության բարելավման համար՝ 300 մլն դրամ:
Վահան Նարիբեկյանը, անդրադառնալով 3 միջոցառման ֆինանսավորման նվազեցմանը, հայտնել է իր անհամաձայնությունը:
ԱԺ աշխատակազմի ղեկավար-գլխավոր քարտուղարը պատասխանել է պատգամավորների հարցադրումներին:
ԱԺ պատգամավոր Զարուհի Բաթոյանի հարցը վերաբերել է խորհրդարանի շենքային պայմանների մատչելիությանը: Նա ընդգծել է, որ քաղաքացիների կարծիքով Ազգային ժողովի շենքի մատչելիությունը միայն իր համար է ստեղծվում, այնինչ այդպես չէ:
Վահան Նարիբեկյանը, պատասխանելով պատգամավորի հարցին, նշել է, որ նախնական քննարկման փուլում նախատեսվել էր մոտ 100 մլն դրամ հատկացնել հաշմանդամություն ունեցող անձանց համար ԱԺ շենքի մատչելիության ապահովմանը, սակայն առկա է խնայողության գաղափարը: Նա ընդգծել է, որ դա կարվի մասնակի՝ ԱԺ միջոցների հաշվին: ԱԺ աշխատակազմի ղեկավար-գլխավոր քարտուղարը հույս է հայտնել, որ 2024 թ. հնարավոր կլինի հիմնովին հարցը լուծել:
ՀՀ Ազգային ժողով
