Կանաչապատման ոլորտում Երևանի բարեփոխումների մասին Դավիթ Խաժակյանի ելույթը ԵԽ Կոնգրեսում
Հարգելի գործընկերներ,
թեման անչափ կարևոր է և բազմակողմ։ Աշխարհում խելացի քաղաքների փորձը շատ հարուստ է և վերաբերում է քաղաքային տնտեսության տարբեր ոլորտների։ Ինչպես գիտեք այս տարվա հուլիս ամսին ՄԱԿ-ի գլխավոր Ասամբլեան ճանաչել է մաքուր, առողջ և կայուն միջավայրի իրավունքը որպես մարդու իրավունք, ինչը կարծում եմ շատ կոնկրետ պարտավորություններ է առաջացնում քաղաքային իշխանությունների մոտ։
Այս կոնտեքստում կարող ենք պնդել, որ խելացի քաղաքներում ժամանակակից լուծումները առավել քան պահանջած են` հատկապես կանաչ միջավայր ձևավորելու հարցում։
Որպես Երևանի ավագանու անդամ ցանկանում եմ Ձեզ ներկայացնել որոշ բարեփոխումներ, որոնք մենք նախաձեռնել ենք վերջին ժամանակահատվածում։ Առաջինը կցանկանայի նշել «Կանաչապատում և շրջակա միջավայրի պահպանություն» ՀՈԱԿ-ի նախաձեռնության մասին, որը վերաբերում է կանաչ տարածքների վերաբերյալ մանրամասն տեղեկությունների թվայնացմանը։
Այս ծրագրի նպատակն է քարտեզագրել և գույքագրել բոլոր այն հանրային տարածքները, որոնք սպասարկվում են Երևան քաղաքի կանաչապատման ծառայության կողմից։
Կարդացեք նաև
Քարտեզագրումը իրականացվում է ժամանակակից GNSS ընդունիչների միջոցով և հնարավորություն է տալիս ճշգրիտ պատկեր կազմելու կանաչապատ տարածքների տեղակայման վերաբերյալ։
Ծրագրի կարևոր բաղադրիչ է հանդիսանում նաև տվյալների բազայի ստեղծումը, որը կմիավորի իրական և ճշգրիտ քարտեզները այդ հողակտորների վրա առկա կանաչ զանգվածի վերաբերյալ տվյալների հետ։ Սա նշանակում է, որ մենք յուրաքանչյուր ծառի և թփի մասին կունենանք էլեկտրոնային տվյալներ, որոնք մեզ կներկայացնեն տեղեկատվություն տնկման տարեթվից մինչև վերջինիս խնամքի իրականացում։
Որպես Երևանի ավագանու անդամ ես շատ եմ կարևորում այս նախաձեռնության իրագործումը և դիմում եմ գործընկերներիս, ովքեր իրենց քաղաքներում առնչվել են նման բարեփոխման հետ։ Մենք շատ կարևորում ենք Ձեր երկրների փորձառությունը այս հարցում և եթե կլինեն հետաքրքրված կողմեր, ուրախ կլինենք լսել դիտարկումներ և ներկայացնել Երևանի կողմից մշակված համակարգի առանձնահատկությունները։
«Լուսավոր Հայաստան» կուսակցություն
