«Վերջին իրադարձությունների առումով կարեւոր եմ համարում, որ միջազգային հարթակներում մեզ հաջողվում է… այն դիրքորոշումը, որն արձանագրել ենք 2020թ․-ին, որ ՀՀ-ի եւ Ադրբեջանի միջեւ կա սահման եւ այն արձանագրված է 1991թ-ի Ալմա Աթայի հռչակագրով»,- ԱԺ մշտական հանձնաժողովների համատեղ նիստում այսօր ՀՀ 2023թ․-ի պետական բյուջեի նախագծի քննարկման ժամանակ հայտարարեց վարչապետ Նիկոլ Փաշինյանը։
«Սա շատ կարեւոր նրբություն է։ Կա սահման։ Եթե չկա, չկա նաեւ ագրեսիայի փաստ։ Սոչիում եւ Պրահայում արձանագրվել է սահմանի առկայությունը եւ դրանով արձանագրվել է ագրեսիայի փաստը՝ սրանից բխող միջազգային արձագանքներով։ Օրինակ, Պրահայի արդյունքներով ԵՄ դիտորդների գործուղումը Երեւան հնարավոր դարձավ միայն նրանից հետո, երբ արձանագրվեց 1991թ․-ի սահմանը։ Այլապես եվրոպացիների մոտ հարց կառաջանար՝ եթե չկա սահման, գալու ենք ի՞նչը դիտենք»,-հարցադրում արեց Նիկոլ Փաշինյանը։
Լուիզա ՍՈՒՔԻԱՍՅԱՆ
