Քաղաքական-հասարակական գործիչ Էդգար Ղազարյանը այսօր «Հայելի» ակումբում խոսեց Հայաստանում քարոզվող խաղաղության դարաշրջանի եւ իրական վիճակի մասին:
«2021 թվականի նոյեմբերի 26-ից հետո Նիկոլ Փաշինյանը Ալիեւի հետ եռակողմ ձեւաչափով այլեւս չէին հանդիպել: Սակայն այս ընթացքում Բրյուսելում եւ Պրահայում ունեցել են հինգ հանդիպում, որոնց ընթացքում բանակցում էին իբր թե տարածաշրջանում խաղաղության հաստատման շուրջ: Բայց ի՞նչ խաղաղություն: Այս ամբողջ շրջանում եղել է ադրբեջանական ներխուժում Հայաստանի տարածք` տարբեր հատվածներում, ադրբեջանական ներխուժում Արցախ Փառուխի շրջանում` Քարագլխի հատվածում, Լաչինի միջանցքի զավթում`Բերձոր, Աղավնո եւ Սուս գյուղերով: Եվ 2022 թվականի սեպտեմբերի 13-14-ի ադրբեջանական ներխուժումը Հայաստանի տարածք եւ հայկական մի շարք բնակավայրերի, այդ թվում` խոշոր առողջարանական քաղաք Ջերմուկի հրետակոծություն: Այսինքն, այս լայնամասշտաբ պատերազմները Նիկոլ Փաշինյան-Իլհամ Ալիեւ-Շարլ Միշել հանդիպումների հետեւանքներն էին:
Իսկ թե ինչ կունենանք մենք այսօր Սոչիի հանդիպումից հետո, սա էլ դժվար է ասել, որովհետեւ եթե Նիկոլ Փաշինյան-Իլհամ Ալիեւ միասնությունը հաղթի այս բանակցություններում, ապա նորից մեծանում է պատերազմի վտանգը: Այսինքն, Ալիեւի կողմից ռազմական գործողություններով Սյունիքը եւ Վայոց Ձորը, Վարդենիսը եւ Տավուշի որոշ հատվածներ զավթելու մտադրությունը, ինչի մասին վերջերս խոսել է փոխվարչապետ Մհեր Գրիգորյանը` նշելով, որ դեռեւս մեծ են ռիսկերը, որ Ադրբեջանը կգրոհի Հայաստանի վրա եւ կունենա նոր տարածքների զավթումներ», -ասաց նա:
Աշոտ ՀԱԿՈԲՅԱՆ
