Aravot.am-ի տեղեկություններով, հոկտեմբերի 24-ին տհաճ միջադեպ է գրանցվել «Գյումրու Մոր և մանկան» ավստրիական հիվանդանոցում։
Հիվանդանոցի վերակենդանացման բաժանմունքի վարիչ Աշիկ Դալիբալդյանը դիմել է ոստիկանության Կումայրի բաժին՝ տեղեկացնելով, որ հոկտեմբերի 24-ին, ժամը 17.30-ի սահմաններում «ցնցումներով» իրենց մոտ են բերել Հ․Մ․-ին, որին հիվանդանոցի ընդունարանում ցուցաբերվել է բուժօգնություն։ Դրանից հետո վիրահատման սպասասրահ են եկել երեխայի մայրը և երկու հարազատները, մոտեցել իրեն ու սպառնալիքներ հնչեցրել։
Մայրը, ըստ հաղորդման, բռնելով բժշկի օձիքից՝ ասել է՝ պետք է ծնկի գա իր երեխայի դեմ, իսկ հորեղբայրը սեռական բնույթի հայհոյանքներ և սպառնալիքներ է հնչեցրել իր հասցեին: Բժշկի բողոքը քննվում է քննչական վարչությունում:
Հիվանդանոցի տնօրենի ժ/պ Հովհաննես Վարձելյանը մեզ հետ զրուցում ասաց, որ տվյալ միջադեպը տեղի է ունեցել ուշ երեկոյան։
Ինքն ուսումնասիրել է փաստաթղթերը․ երեխան «Գյումրու Մոր և մանկան» ավստրիական հիվանդանոցում վիրահատվել է դեռևս 8 տարի առաջ՝ 2014 թվականին, հեռացրել են նրա նշիկները։
Հովհաննես Վարձելյանի ասելով՝ երեխայի մոտ հետվիրահատական խնդիրներ են առաջացել, այն քննել են իրավապահները, դատաբժշկական փորձաքննություն է նշանակվել, դատարանում լսվել է, բժշկի մեղավորությունը չի հաստատվել։
Տնօրենի ժ/պ-ն պատմեց, որ ինքը ընդունել է հիվանդատերերին, քաղաքակիրթ զրույց է ընթացել՝ փոխըմռնմամբ, փաստաթղթերի վկայակոչմամբ, որից հետո նրանք հեռացել են։ Սակայն իր՝ աշխատավայրից հեռանալուց հետո նորից եկել են ու միջադեպ հրահրել։
Ըստ Հովհաննես Վարձելյանի, եթե անգամ վրդովված են, հարցի լուծման նման եղանակն անընդունելի է։
