Մենք կարևորում ենք Արցախի Հանրապետության Ազգային ժողովի ս.թ. հոկտեմբերի 30-ին տարածած հայտարարությունը, համարելով, որ այն մեր երկու ազգերի համար ունի չափազանց կարևոր նշանակություն։
Սույն հայտարարության մեջ արտահայտված է Արցախի խորհրդարանի բոլոր քաղաքական ուժերի միասնական դիրքորոշումը, Արցախի Հանրապետության ամբողջ ժողովրդի ներկայացուցչական մարմնի միահամուռ կարծիքը, ուստի վստահաբար միանում ենք բարձրաձայնված բոլոր կետերին և համարում, որ Լեռնային Ղարաբաղի հիմնահարցի կարգավորման համար որպես ելակետներ անհրաժեշտ է ընդունել՝
• Ադրբեջանական Հանրապետության կազմում որևէ ձևով Արցախի Հանրապետության և նրա ժողովրդի գոյության անհնարինությունը՝ հաշվի առնելով Բաքվի վարչախմբի բռնապետական մարդատյաց և ցեղասպան բնույթը,
• Արցախի Հանրապետության ժողովրդի Ադրբեջանական Հանրապետության կազմից դուրս ինքնորոշման արդեն իսկ իրացված անքակտելի իրավունքի ճանաչումը։
Ժողովրդի ձայնը գերակա է ՀՀ որևէ իշխանության և անգամ գերտերությունների ցանկացած որոշման առաջ։ Արցախի անվտանգության երաշխավորը եղել և մնալու է Արցախցին, ուստի այստեղ այլ որոշում կայացնել՝ անհնարին է։
«Ուժը հայրենյաց» կուսակցությունը հայտարարում է՝
•Մենք պայքարելու ենք Արցախի Հանրապետության ժողովրդի ինքնորոշման միջազգային ճանաչման և նրա անվտանգության լիարժեք վերականգման ուղղությամբ, որի ապահովման առանցքային դերակատարը դաշնակից և բարեկամ պետությունների աջակցությամբ պետք է կրկին դառնա Հայաստանի Հանրապետությունը։
•Արցախի հիմնախնդրի հայանպաստ լուծումը միակ ճանապարհն է երկու ժողովուրդների հզոր գոյության և անվտանգ ապագայի կերտման։
«Ուժը հայրենյաց» կուսակցություն
