Այսօր 2023 թվականի պետբյուջեի նախագծի քննարկման ժամանակ ԱԻՆ նախարար Արմեն Փամբուխչյանը չէր եկել, նրա փոխարեն տեղակալն էր՝ Արտյուշ Գրիգորյանը: Ինչպես նշեց ԱԺ պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանը, երեկ նախարարը զգուշացրել է, թե պետք է լինի «այլ տարածքում»: Անդրանիկ Քոչարյանը եզրակացրեց. «Քանի որ այդ տարածքը նույնպես կարեւոր է մեր արտակարգ իրավիճակներին առնչվող խնդիրների լուծման տեսանկյունից, գերատեսչության բյուջետային խնդիրների մասին մեզ կտեղեկացնի առաջին տեղակալը»:
Բայց այ Քոչարյանը չէր սպասում, որ ոստիկանապետ Վահե Ղազարյանն էլ չի գալու: Նրա փոխարեն տեղակալը՝ Արա Ֆիդանյանն էր եկել: «Պարո՛ն Ֆիդանյան, ո՞ւր է պարոն Ղազարյանը»,- հետաքրքրվեց հանձնաժողովի նախագահը: Ֆիդանյանը կարկամեց, ասաց՝ զբաղվածության պատճառով խնդիր կար, չի եկել. «Դեպք է պատահել»:
Անդրանիկ Քոչարյանը նկատողություն արեց. «Օրինակ, պարոն Պապիկյանը առավոտը 6-ին զանգել է, ասել է՝ զավակ եմ ունեցել, մենք կարայի՞նք չհարգեինք: Վերջապես ՊՆ նախարարը իր առաջին զավակն ունեցավ: Մեր մյուս գործընկերը պետք է գնար այլ տարածք: Բայց Երեւանի մեջ ենք, պարո՛ն Ֆիդանյան, պառլամենտի ամենակարեւոր բյուջետային քննարկման օրն է, կարող է հարցեր կան, որ մենք ուզում ենք հենց առաջին դեմքի հետ քննարկենք»:
Կարդացեք նաև
Հռիփսիմե ՋԵԲԵՋՅԱՆ
Լուսանկարը՝ Սուրեն Պապիկյանի ֆեյսբուքյան էջից
