«Ասվեց բաներ, որոնք մեզ հայտնի էին, եւ որոնք, սակայն, հերքվում էին իշխանության կողմից։ Կուզեմ հասարակությանը տեղեկացնել, որ 44-օրյա պատերազմը կարող էր տեղի չունենալ, եթե Փաշինյանը չընտրեր պատերազմի ճանապարհը։ ՌԴ ղեկավարն ամրագրեց, որ պատերազմը կարող էր չլինել, եթե բանակցային գործընթացը փակուղի չմտցվեր»,-լրագրողների հետ ճեպազրույցում այսօր անդրադառնալով ՌԴ նախագահ Վլադիմիր Պուտինի երեկվա հայտարարություններին՝ ասաց ԱԺ «Հայաստան» խմբակցության պատգամավոր Անդրանիկ Թեւանյանը։
Ըստ նրա, Պուտինի խոսքերից ստացվում է, որ Նիկոլ Փաշինյանը համաձայնել է վաշինգթոնյան փաստաթղթին, ըստ որի՝ Արցախը պետք է լինի Ադրբեջանի կազմում․ «Սա Փաշինյանին հնարավորություն է տալու հետո ապաստանել արեւմտյան որեւէ երկրում։ Պուտինը նաեւ ասաց, որ դա ՀՀ-ի որոշումն է, եւ ոչ թե ՌԴ-ի եւ արեւմուտքի։ Ուստի Փաշինյանն ինքն է նախաձեռնել Արցախն Ադրբեջանին հանձնելը, եւ եթե հայ ժողովուրդը սրա հետ համակերպվի, ՌԴ-ն ոչինչ չի կարող անել։ Սրանով մեզ ուղերձ են հղում, որ ժողովուրդը պետք է արտահայտի դիրքորոշում»։
Հիշեցնենք՝ Վլադիմիր Պուտինն ասել է, որ Ռուսաստանը հավանություն կտա Հայաստանի համար ընդունելի ցանկացած տարբերակին, սակայն իր կողմից որևէ ճնշում չի բանեցնի:
Կարդացեք նաև
Անդրանիկ Թեւանյանը շեշտեց՝ եթե առաջիկայում քաղաքական փոփոխություններ չլինեն, պետականության կորստի առաջ ենք կանգնելու։ Ինչ վերաբերում է փաստին, որ հոկտեմբերի երեսունին Արցախում հանրահավաք է սպասվում, Թեւանյանը նկատեց․ «Դա արցախահայության իրավունքն է, որովհետեւ արցախահայությունը պետք է իմանա՝ իրենց Փաշինյանը պատրաստվում է հանձնել Ադրբեջանին։ Դա շատ կարեւոր հավաք է, դրան պետք է բոլոր քաղաքական ուժերը մասնակցեն, այդ թվում՝ Արայիկ Հարությունյանը։ Հայաստանյան բնակչությունն էլ պետք է իմանա՝ սուտ է, թե Արցախը հանձնելով մենք կունենանք խաղաղություն։ ՀՀ-ի գոյությունը վտանգված է»։
Լուիզա ՍՈՒՔԻԱՍՅԱՆ
